Сэлэнгэ аймгийн Онцгой байдлын газраас мэдээлэл хийлээ. Сэлэнгэ аймгийн Сүхбаатар сумын иргэн Ц-ээс Ковид-19 халдвар илэрсэн байна. Тухайн иргэн ач хүүгийн хамтаар амьдардаг байна.  Тэрбээр энэ сарын 6-наас эхлэн 38 хэм хүртэл халуурч,  толгой өвдөж байна гэсэн өгүүлэмжтэйгээр өрхийн эмнэлэгтээ хандсан байна. Ингэхдээ 10 хоногийн өмнөөс ханиалгаж байжээ. Ингээд энэ сарын 8-ны өдөр Дархан-Уул аймаг руу ач хүүгийн хамтаар вагоноор зорчиж дэлгүүр ороод өдөртөө буцсан байна. Ингээд 9-ны өдөр Сэлэнгэ аймгийн нэгдсэн эмнэлэгт хандсан байна. Түүнээс хоёр удаагийн шинжилгээ авахад ЭЕРЭГ гарсан байна. Түүний хамгийн ойрын хавьталд орсон бүх хүнийг олж тогтоон шинжилгээ авсан байна. Яг одоо ХӨСҮТ-рүү иргэн Ц-г хүргэх ажиллагааг зохион байгуулж байна гэлээ. Ингэснээр Сэлэнгэ аймагт халдварын шинэ голомт үүслээ гэдгийг албаныхан хүлээн зөвшөөрч байна. Учир нь иргэн Ц, жолооч Д-тэй ямар нэгэн холбоогүй гэдгийг хэлж байгаа юм. 

Сэлэнгэ аймгийн Баянгол сумын 25 иргэн энэ сарын 8-нд Улаанбаатар хотод болсон "Хархан нүдэн" тоглолтыг үзсэн байна. Тэднээс шинжилгээ авахад хариу нь сөрөг гарчээ. 

Мөн дээрх Сэлэнгэ аймгийн иргэн Ц  Дархан-Уул аймаг руу зорчсонтой холбогдуулан тус аймгийн Онцгой байдлаас мэдээлэл хийж байна. Тус аймагт мөн нэг сэжигтэй тохиолдол илрээд байгаа юм. Тиймээс Дарханд хөл хориог хатуу тогтоож, хөдөлгөөнийг хязгаарлана гэдгээ мэдэгдлээ.