Алтанбулаг боомтоор ачаа зөөвөрлөн орж ирсэн жолооч Д нь коронавирусийн халдвар авсан нь батлагдаж, улмаар түүний эхнэр болон ойрын хавьтлын гурван хүн мөн халдвар авсан нь тогтоогдоод байгаа юм. Түүнийг тусгаарлалтын 21 хоногийн хугацаагаа дуусгаад гэртээ гарснаас нь хойш коронавирусийн халдвар илэрсэн билээ. Тодруулбал, түүнийг эмнэлгээс гарснаас гурав хоногийн дараа ХӨСҮТ-өөс холбогдож, дахин шинжилгээ авснаар "Ковид-19"-ын халдвар авсан нь тогтоогдсон юм. Жолооч Д эмнэлгийн удаа дараагийн шинжилгээгээр хариу нь сөрөг гарсан учраас дуучин Д.Дэмбэрэлнямбуугийн "Хархан нүдэн" тоглолтыг эхнэр болон хадам ээж, дүүгийн хамт үзсэн байдаг. Тэрбээр тоглолтын дараа Д.Дэмбэрэлнямбуу дуучинтай гар барьж, дурсгалын зураг татуулсан гэх мэдээлэл бий. Улмаар уг дуучныг ойрын хавьтлын 10 хүнтэй нь өчигдөр ХӨСҮТ-д тусгаарласан юм. Түүний шинжилгээний хариу гарсан эсэх талаар Д.Дэмбэрэлнямбуугаас тодрууллаа.

      Тэрбээр "Миний болон ах дүү нарын маань шинжилгээний хариу СӨРӨГ гарсан. Намайг Увсад тоглолт хийсэн гэж зарим хэвлэлээр худал бичиж байна. Би аймагтаа очоогүй. Улаанбаатар хотод тоглолт хийсэн. Миний тоглолтыг 2000 гаруй хүн үзсэн. Миний тоглолтыг үзсэн бүх хүн зүгээр байгаасай гэж залбирч байна. Халдвар авсан жолоочийг би сайн танина.Түүнтэй гар барьж, зургаа татуулсан нь үнэн. Хэн ч халдвартай гэдгийг нь мэдэхгүй шүү дээ. Түүний буруу ч гэж байхгүй, өвчин хэлж ирэхгүй, хийсч ирдэг гэдэг. Цаашид энэ өвчин намдаж, сайхан цаг ирэхээр ард түмэнтэйгээ олон сайхан уран бүтээлээрээ уулзана. Шинжилгээний хариу сөрөг гарсанд баяртай байна" гэлээ.