Эрүүл мэндийн яамнаас ковид-19 халдварын нөхцөл байдлын талаар мэдээлэл хийж байна. Арваннэгдүгээр сарын 11-нд нийтдээ 640 хүнд шинжилгээ хийсэн байна. Үүнээс 24 хүнд коронавирусын халдвар илэрчээ. Ингэснээр манай улсад батлагдсан тохиолдол 406 болж байна. Мөн Алтанбулаг боомтоор орж ирсэн ачаа тээврийн жолоочоос халдвар илэрсэн. Улмаар ойрын хавьтлын гурван хүнээс нь халдвар илрээд байсан юм. Үүнтэй холбогдуулан дотоодын халдварыг зогсоохоор тав хоногийн хатуу хөл хориог тогтоогоод байгаа. Дээрх халдвар авсан хүмүүсийн ойрын хавьтлын  73 хүнээс шинжилгээ авч 48 хүний шинжилгээний хариу гарсан байна. Үүнээс нэг хүнээс нэмж коронавирус илэрчээ. Харин хоёрдогч хавьтал 171 хүний шинжилгээний хариу сөрөг гарсан байна. Одоогоор ХӨСҮТ-д 84 батлагдсан тохиолдол байна. 

Тиймээс гэрээсээ гарахгүй байх, халдвар хамгааллын дэглэмээ сайтар мөрдөхийг анхаарууллаа. Дэлхий нийтэд уг өвчнөөр халдвар авсан хүний тоо 51 сая хүрчээ. Мөн манай улстай хил залгаа Орос улсын нутаг дэвсгэрт халдварт өвчний дэгдэлт их байгаа учраас иргэдийг сонор сэрэмжтэй байхыг анхаарууллаа.