Өнгөрсөн аравдугаар сарын 14-нд Сэлэнгэ аймаг дахь "Алтанбулаг" боомтоор орж ирсэн ачаа тээврийн автомашины жолооч нь “Энхсаран” сувилалд тусгаарлагджээ. Ингэхдээ нэг жолоочтой хамт нэг өрөөнд орсон байна. Гэтэл тэднийг тусгаарлагдсанаас гурав хоногийн дараа дахин нэг жолоочийг нэмж, хамтад нь нэг өрөөнд оруулжээ. Улмаар эхний хоёр жолоочийг тусгаарлах 21 хоногийн хугацаа дуусч гэрийн хяналтад шилжүүлсэн байна. Тэднийг гэртээ гарснаас дөрөв хоногийн дараа үлдсэн жолоочийн шинжилгээний хариу эерэг гарсан байна. Тиймээс дээрх жолооч болон эхнэрээс нь шинжилгээ авахад халдвар илэрсэн нь тогтоогдсон байна.

Өөрөөр хэлбэл, халдвар гадагш тархах болсон шалтгааныг тусгаарлалтын горим зөрчсөнөөс үүдсэн гэж хэлж болохоор байна. Учир нь, тусгаарлалтын байранд нэг, нэгээр нь юм уу эсвэл хоёроор нь тусгаарлаж байсан. Гэтэл тэдний дээр нэмж нэг хүн оруулсан нь тусгаарлалтын горим зөрчигдсөн гэж үзэж болохоор байгаа юм. Өөрөөр хэлбэл, халдваргүй хоёр жолоочийг, халдвартай жолоочтой хамтад нь тусгаарлаж, давтан шинжилгээний хариу гарахаас өмнө тусгаарлалтаас гаргасан нь халдвар гадагш тархах нөхцөл үүссэн байхыг үгүйсгэхгүй.

Эрүүл мэндийн сайд Т.Мөнхсайхан "Тусгаарлалт хариуцаж байсан "Энхсаран" сувилал дээр халдвар алдагдсан байж болзошгүй гэж үзээд, тус сувилалд байсан хүмүүсийг өчигдөр ХӨСҮТ рүү яаралтайгаар шилжүүлсэн. Тандалтаа үргэлжлүүлж, халдвар хожуу илрэв үү, тусгаарлалтын явцад халдвар авсан уу гэдгийг тодорхой болгоно" гэдгийг хэвлэлийн хурлын үеэр хэлж байсан.