Улсын онцгой комиссоос яг одоо мэдээлэл хийж байна. Шадар сайд Я.Содбаатар “Өнгөрсөн 10 сарын хугацаанд Ковид-19 халдварт өвчнөөс урьдчилан сэргийлэх чиглэлээр манай улс маш сайн ажилласан гэж бодож байна. Харин одоо энэ Ковид-19 өвчинтэй нүүр тулах цаг боллоо” гэлээ. Тиймээс ард иргэд айж сандрахгүй, уужуу тайван байж, бодит мэдээллийг авч хамтдаа даван туулах ёстойг санууллаа.

Мөн Эрүүл мэндийн сайд Т.Мөнхсайхан “Аравдугаар дугаар сарын 14-нд Алтанбулагийн боомтоор орж ирсэн жолооч Сэлэнгэ аймагт шинжилгээ өгсөн. Ингээд Энхсаран сувилалд 21 хоног тусгаарлагдаад тэр хугацаандаа гурван удаа шинжилгээ өгсөн. Арваннэгдүгээр сарын 10-нд дахин шинжилгээ хийж үзэхэд эхнэр болон өөрөөс нь халдвар илэрсэн. Одоогийн байдлаар нэгдүгээр зэргийн 24 хавьтагчийг Халдвартын эмнэлэгт тусгаарлаад, шинжилгээ авсан. Хоёр цагийн дараа шинжилгээний хариу гарна. Халдвар авсан иргэн эхнэр, цэцэрлэгийн насны хоёр хүүхдийн хамт амьдардаг байсан. Хашаандаа ээж аав нь хамт амьдардаг байсан” гэлээ.

Мөн Эрүүл мэндийн яам бэлэн байдлыг хангаж ажиллаж байгаа. Үүнээс гадна иргэд үүргээ биелүүлж, амны хаалтаа зүүх, хоорондын зайгаа барих, гараа ариутгах зэрэг урьдчилсан сэргийлэх арга хэмжээг авах хэрэгтэйг анхаарууллаа. Мөн яаралтай биш тохиолдолд эмнэлэгийн байгууллагаар үйлчлүүлэхгүй байх, коронавирсийн шинж тэмдэг илэрвэл 119 дугаарт хандаж зөвлөгөө авахыг анхаарууллаа.

Түүнчлэн Засгийн газрын хуралдаанаар Сэлэнгэ аймаг дахь хилийн Алтанбулаг боомтыг арваннэгдүгээр сарын 16-наас хоёр сарын хугацаанд хаахаар болсон. Мөн Баян-өлгий, Увс аймгийн хилийн боомтуудыг шат дараатайгаар хаах шийдвэрийг гаргаж, хүндэтгэн үзэх шалтгаантай авто тээврийг Улсын онцгой комиссын зөвшөөрлөөр нэвтрүүлэхээр болжээ.

Мөн Улаанбаатар хотоос гарах тээврийн хэрэгслийн хөдөлгөөнийг зогсоосон. Харин хот руу орох хөдөлгөөн нээлттэй байгаа гэлээ. Улаанбаатар хотоос орон нутаг руу явж байгаа хүндэтгэн үзэх шалтгаантай автомашиныг УОК-ын зөвшөөрлөөр нэвтрүүлэх юм байна.

Мөн 45-60 хоногийн хүнсний нөөц байгаа учраас хүнсний зохиомол үнийн хөөрөгдөл үүсгэхгүй байхыг хотын дарга Д.Сумъяабазар анхаарууллаа. Тиймээс иргэдийг айж сандрахгүй, уужуу тайван байхыг санууллаа. Нийслэл, бүх байгууллага бэлэн байдалд ажиллаж байгаа гэлээ.