Коронавирусийн халдварын зургаан тохиолдол нэмж бүртгэгджээ. Үүн дотор ХӨСҮТ-ийн халдвар авсан сувилагчтай хамт ажиллаж байсан эмчээс халдвар илэрсэн байна. Ингэснээр Монгол Улсад батлагдсан тохиолдол 374 боллоо. Үүнээс 317 нь эдгэрсэн бол 54 нь ХӨСҮТ-д эмчлэгдэж байна гэж ЭМЯ-наас мэдээллээ. ХӨСҮТ-д эмчлүүлж байгаа 44 хүний биеийн байдал хөнгөн, есөн хүний биеийн байдал хүндэвтэр, нэг хүний биеийн байдал хүнд байгаа аж. Өнгөрсөн баасан гарагт коронавирусийн голомтод ажиллаж байсан сувилагчийн хяналтын шинжилгээнээс коронавирусийн халдвар илэрсэн юм. 

Мөн өчигдөр зургаан тохиолдол бүртгэгдсэн. Эдгээр хүн нь Сөүл-Улаанбатарын онгоцоор ирсэн болон Алтанбулагийн боомтоор орж ирсэн ачаа тээврийн жолооч байв. Монгол Улсад "Ковид-19" халдвар бүртгэгдсэн цагаас хойш өнөөдрийг хүртэл эрүүл мэндийн салбарынхан 94593  хүнд шинжилгээ хийсэн бол нийт 32422  хүн тусгаарлагджээ.