ХӨСҮТ-д тусгаарлагдаж буй коронавирустэй өвчтөнүүдийг эмчилж байсан сувилагч халдвар авсан нь хяналтын шинжилгээгээр тогтоогдоод байгаа. Энэ талаар ХӨСҮТ-ийн захирал Д.Нямхүү "Эмчилгээний баг 14 хоног ажиллаад, 14 хоног тусгаарлагддаг. Тухайн сувилагчийн хувьд анхны ээлжиндээ ажиллаад халдвар авсан. Гэхдээ тусгаарлалтад байх үедээ коронавирус илэрсэн учраас гадагшаа алдсан байх боломжгүй" гэж мэдэгдээд буй.

Тэгвэл тухайн сувилагч нь БНСУ-д ажиллаж байгаад  өнгөрсөн наймдугаар сард ирсэн. Тусгай үүргийн нислэгээр ирээд 21 хоног тусгаарлагдаж, тусгаарлалтаас гараад ХӨСҮТ-д ажилдаа буцаж ороод нэг сар болж байсан гэх мэдээлэл байна. Өөрөөр хэлбэл ХӨСҮТ-д ажиллаж байхдаа халдвар аваагүй, түүнээс өмнө буюу БНСУ-аас халдвартай ирсэн байж болзошгүй байгаа юм. Хэрвээ тийм бол тусгаарлагдаж байх үедээ ямар хүмүүстэй уулзсан, тусгаарлалтаас гараад гэрийнхэнтэйгээ уулзсан эсэх гээд ноцтой асуудал үүсэх эрсдэлтэй байна. 

Энэ талаар УОК-оос тодруулахад уг мэдээллийг үгүйсгэсэнгүй. Тодруулбал, "ХӨСҮТ-ийн халдвар авсан сувилагч БНСУ-аас ирээд нэг сарын дараа ажилдаа орсон мэдээллийг бид шалгаж байна. ХӨСҮТ-д ажилдаа ороод нэг сар болохдоо хэнтэй уулзсан, халдвар хамгааллын дэглэм зөрчсөн эсэхийг тогтоохоор сарын хугацааны бүх камерийн бичлэгийг шалгаж байгаа. Энэ тухай мэдээллийг нэгдсэн байдлаар ирэх долоо хоногт танилцуулна" гэлээ.