Монгол Улсын Ерөнхий сайд Д.Бямбасүрэнгийн ОХУ-д хийсэн албан ёсны айлчлалын үеэр “Архивын салбарт хамтран ажиллах тухай” Монгол-Оросын Засгийн газар хоорондын хэлэлцээрийг байгуулж, анхны хуралдаанаа 1992 оны 10 дугаар сард Улаанбаатар хотод хийж байсан түүхтэй. Тэгвэл Архивын ерөнхий газраас санаачлан дээрх хамтын ажиллагааны хүрээнд “Дэлхийн хоёрдугаар дайны үеийн  Монгол-Зөвлөлтийн харилцаа, хамтын ажиллагаа” сэдэвт архивын баримт бичиг, гэрэл зураг, баримтат кино, эд өлгийн үзэсгэлэнг өөрийн байрны үзэсгэлэнгийн танхимд дэлгээд байна.

Тус үзэсгэлэн Монгол Улсын Үндэсний төв архив, Батлан хамгаалахын төв архив, Гадаад харилцааны төв архив, ОХУ-ын Ерөнхийлөгчийн дэргэдэх Архивын агентлаг, холбогдох төрийн архивуудын хөмрөгт хадгалагдаж буй дэлхийн хоёрдугаар дайны үеийн БНМАУ-ын нийгэм, эдийн засгийн байдал ба Монгол, Оросын эдийн засаг, соёлын харилцааны түүхэнд холбогдох олон сонирхолтой 150 орчим баримт бичиг, гэрэл зураг, баримтат кино гэсэн  үндсэн дөрвөн хэсгээс бүрдсэн юм. Үзэсгэлэнд тавигдсан баримт бичиг, гэрэл зураг, баримтат кино зэрэг нь үндсэн эх баримт болон хуулбар хэлбэрээр дэлгэгдсэнээрээ онцлогтой.