Засгийн газрын хуралдаанаар сургууль цэцэрлэгийн үйл ажиллагааг өнгөрсөн есдүгээр сарын 21-нээс хэвийн горимд шилжүүлэх шийдвэр гаргасан. Улмаар өнөөдрийг хүртэл бүх шатны сургалтын байгууллага хэвийн горимоор хичээллэж байна. Түүнчлэн сурагчдын нэгдүгээр улирлын амралтыг арванхоёрдугаар сарын 21-нд эхлүүлж, хоёрдугаар сарын 1 хүртэл амраахаар болсон билээ.

 

Харин  сурагчдын нэгдүгээр улирлын амралтыг урагшлуулах саналыг УОК-т хүргүүлсэн гэх мэдээлэл өнөөдөр цахим орчинд түглээ. Энэ асуудлаар БШУЯ-ны хэвлэл мэдээллийн албанаас тодруулахад “Сурагчдын нэгдүгээр улирлын амралтыг урагшлуулах талаар манай яаманд ярьсан зүйл байхгүй. Тийм санал гараагүй байгаа. Эцэг эхчүүд цахим болон утсаар сурагчдын амралтыг урагшлуулах санал хэлж байгаа ч яг албан бичгээр ирүүлсэн санал байхгүй. Иргэдийн саналыг үндэслэн манай яамнаас УОК-д санал хүргүүлэх боломжтой. Яагаад ийм мэдээлэл гараад байгааг сайн  мэдэхгүй” гэх тайлбарыг өгөөд байна.