Нийслэлийн удирдах ажилтны шуурхай зөвлөгөөн өнөөдөр боллоо. Энэ үеэр Замын хөдөлгөөний төлөвлөлт, зохицуулалт, инженерчлэлийн газрын дарга С.Энхтөр түгжрэлийн асуудлаар илтгэл танилцуулав.  

Тэрбээр "Нийслэлд 604 мянга 818 автомашин хөдөлгөөнд оролцож байна. Хотод бүртгэлтэй тээврийн хэрэгслийн 75 хувь нь 10-аас дээш жилийн насжилттай. Мөн манай улсад нийтийн тээврийн 900 орчим хэрэгсэл бий. Хүртээмжийн хувьд нэг сая хүн амтай хотод 1000 тээврийн хэрэгсэл байх ёстой. Тиймээс хөдөлгөөнд хүрэлцээтэй байхын тулд нэмэлтээр 600 орчим нийтийн тээврийн хэрэгсэл шаардлагатай.

Нийслэлийн төвд буюу 20-30 минут алхах зайд нийт 190 мянган иргэн амьдардаг гэсэн судалгаа бий. Эдгээр иргэний 63 хувь нь тээврийн хэрэгсэл ашиглаж байгаа нь явган хүний зам, нийтийн тээврийн хүртээмж хангалтгүй байгаатай холбоотой. Тиймээс түгжрэлийг ойрын хугацаанд бууруулахын тулд гудамж замын сүлжээг хөгжүүлэх, холбоос замыг нээх, авто зогсоолын нэгдсэн системтэй болох хэрэгтэй. Мөн нийтийн тээврийн богино эргэлтийг бий болгож, 10 орчим нүхэн гарц нэмэх, уулзвар, гэрлэн дохионд инженерчлэл хйих шаардлагатай. Энэ оноос эхлээд 1 дүгээр бүс цаашлаад 2, 3 дугаар бүс рүү авто зогсоолыг тэлнэ. Зогсоол, явган алхалтын бүс, зангилаа цэгүүдийг бий болгоход анхаарна” гэв.