Цагдаагийн Ерөнхий газар, Монголбанк, Голомт банк хамтран “Ятгах тусам нягтал 2” аяны нээлтийн талаар өнөөдөр мэдээлэл хийлээ.

Энэ үеэр ЦЕГ-ын  мөрдөн байцаах албаны залилах гэмт хэрэг  мөрдөн шалгах хэлтсийн ахлах мөрдөгч, цагдаагийн хошууч Б.Эрдэнэдэлгэр “Өмнө нь зохион байгуулагдсан хоёр аяны хүрээнд энэ төрлийн гэмт хэрэг 19.2 хувиар буурсан эерэг үр дүн гарсан. Цахим орчинд үйлдэгдэж байгаа залилах гэмт хэрэг 2016 онд огт бүртгэгдээгүй байсан бол 2017 онд 292 гэмт хэрэг бүртгэгдсэн. 2019 онд зөвхөн цахим гэмт хэргийн залилангийн  улмаас 13 тэрбум төгрөгийн хохирол учирсан. 

Түүнчлэн өнгөрсөн арван жилийн хугацаанд залилангийн гэмт хэргийн улмаас нэг их наяд 294 тэрбум 850 сая төгрөгийн хохирол учирсан. Залилах гэмт хэргийн хохирогчдын  50-аас дээш хувь нь эмэгтэйчүүд байдаг. Энэ мөнгөний урсгал нь Монгол Улсын хилийн гадагшаа чиглэж байгаа юм. Тиймээс “Ятгах тусам нягтал-3″ аяныг цахим орчинд үйлдэгдэж байгаа гэмт хэргээс урьдчилан сэргийлэх зорилгоор эхлүүлж байна” гэв.

Харин Голомт банкны мэдээлэл технологи хариуцсан захирал М.Сайнбилэг “Ятгах тусам нягтал 3” аян нь олон улсын гуйвуулга, интернет банкны үйлчилгээ, тооцооны картны аюулгүй байдал, онлайн худалдаа,  цахим залилангийн гэмт хэрэг гэсэн таван чиглэлд өрнөнө. Сүүлийн хоёр жилийн хугацаанд банкны салбарт дижитал шилжилт эрчимтэй хэрэгжиж байгаа нь  нэг талаараа давуу тал авчирч байгаа боловч нөгөө талдаа залилангийн гэмт хэрэг дагаад өсч байна” хэмээн ярилаа.