МҮОНРТ-ийн захирал Л.Нинжжамц өнөөдөр өөрийн хүсэлтээр үүрэгт ажлаа хүлээлгэн өгч байгаа талаараа мэдэгджээ. Өнгөрсөн долоо хоногт МҮОНРТ-ийн уран бүтээлчид ерөнхий захирал Л.Нинжжамцын дур зоргоороо авирлан хууль зөрчсөн үйлдлийг зогсоож, хөдөлмөрийн гэрээг нь цуцлахыг эрх баригчдаас шаардсан юм.

Л.Нинжжамц уран бүтээлчдийн санал санаачилгыг дэмждэггүй, дарга нарын хүсэлтээр нэвтрүүлэг бэлтгэдэг гэнэ. Мөн жирийн ажилтнуудын цалинг хасаж, өөрийн болон хамаарал бүхий хүмүүстээ өндөр цалин өгч байсан нь ил болсон юм. Жишээлбэл, 720 мянган төгрөгийн цалинтай Үндэсний зөвлөлийн гишүүд дөрөвдүгээр сараас 1.2 сая төгрөгийн цалинтай болсон байгаа юм. Мөн ажилчдын хуримтлагдсан цалинг үр ашигтай ажилласан гэж Үндэсний зөвлөл үзэн захирал Л.Нинжжамцыг зургадугаар сард 30 сая төгрөгөөр шагнажээ. Үүнээс татвараа төлж, гар дээрээ 21 сая төгрөгийг авсан гэдгийг ажилчид, уран бүтээлчид дэлгэсэн юм. Ийнхүү МҮОНРТ-ийн Захирлуудын зөвлөлийг огцруулахаар 250 гаруй уран бүтээлчид гарын үсгээ зуржээ. 

Л.Нинжжамц нь “Толь” сонины ерөнхий редактораар ажлын гараагаа эхлүүлж байв. Үүнээс хойш Монголын сонины холбооны гүйцэтгэх захирал, МҮОНРТ-ийн Тамгын газрын дарга, Засгийн газрын хэрэг эрхлэх газрын Хэвлэл мэдээллийн албаны дарга, Үндэсний хөгжил, шинэтгэлийн хорооны даргын зөвлөх, “Өглөөний сонин”-ы Ерөнхий эрхлэгчээр ажиллаж байжээ. Харин 2016 оноос МҮОНРТ-ийн ерөнхий захирлын албыг хашиж байгаа юм.