Баянгол дүүргийн 20 дугаар хороо, Таван шарын төмөр замын гарамд засварын ажил хийгдэх тул тус хэсгийн замыг бямба гарагийн 08:00 цаг хүртэл хааж байгаа талаар өнөөдөр Замын хөдөлгөөний төлөвлөлт, зохицуулалт, инженерчлэлийн газраас мэдээллээ.

Зам хаахтай холбогдуулан тухайн байршилд 600 мм-ийн цэвэр усны шугамын эвдрэлийг засварлах, Авто замын засвар нөхөөс, Төмөр замын эвдрэлтэй төмөр бетон дэр солих зэрэг засварын ажил хийх аж. Иймд жолоочид тухайн замаар зорчилгүй, Саппорогийн тойрог, Хөсөг трэйдийн уулзвар, Эрчим хүчний гудамж буюу ТЭЦ-4-ийн зам, Сонсголонгийн уулзвар, Моносын уулзвар гэсэн замыг сонгон хөдөлгөөнд оролцохыг зөвлөлөө.

Уг ажлын гүйцэтгэгчээр "Хүрд" ХХК, Замын 2-р анги, "Нано Экологи" ХХК ажиллах юм байна. Засварын ажилд Улаанбаатар төмөр зам, Ус сувгийн удирдах газар, Нийслэлийн автозамын хөгжлийн газраас хяналт тавих юм.