Энэ сарын 14-нд Улаанбаатар-Хөххот чиглэлд ниссэн OM223 нислэгийн  зорчигчдоос коронавирусийн шинжилгээ авахад таван хүний хариу нь эерэг гарсан тул  аравдугаар сарын 20-ноос нэг долоо хоногийн хугацаагаар нислэгийг зогсоосон тухай БНХАУ-ын “China news” тэргүүтэй мэдээллийн сайтуудад мэдээлжээ. 

Тодруулбал, БНХАУ-ын Иргэний агаарын тээврийн газар халдварт өвчин, цар тахлаас урьдчилан сэргийлэх асуудлаар зөвлөлдөж, “Ethiopian Airlines”, “China Southern Airlines” “Saudi Arabian Airlines”, “Vietnam Airlines”, “Mongolian Airlines” зэрэг дотоодын 29, гаднын 41 компанид зааварчилгаа өгч, олон улсын 132 нислэгийг тодорхой хугацаагаар зогсоосон тухай цахим хуудсандаа мэдээлжээ. Учир нь олон улсын зорчигч тээврийн нислэгийн зорчигчдоос коронавирус илэрсэн тохиолдол цөөнгүй бүртгэгдээд байгаа юм. Тухайлбал, энэ сарын 6,13-нд нислэг үйлдсэн Аддис-Абеб-Шанхай чиглэлийн ET684 нислэгийн 5,10 зорчигчоос коронавирусийн халдвар илэрсэн тул нислэгийг таван долоо хоногийн  хугацаатайгаар зогсоожээ. Түүнчлэн Аддис-Абебаас Чэндү, Гуанжөү рүү тус компанийн нислэгээр ирсэн зорчигчдоос ч “Ковид-19”-ийн шинжилгээ авахад эерэг хариу гарсан аж.  Түүнээс гадна “China Southern Airlines” компанийн CZ348 нислэгээр Парисаас Гуанжөүд ирсэн 10 зорчигч, Катманду-Гуанжөү чиглэлийн нислэгийн таван зорчигч, Эр-Рияд-Гуанжөү чиглэлийн нислэгийн найман зорчигч, Ханой-Жэнжөү чиглэлийн нислэгийн долоон зорчигчдоос коронавирусийн халдвар илэрсэн байна. 

Эх сурвалж: http://www.caacnews.com.cn/, https://finance.sina.com.cn/