Өнгөрсөн амралтын өдрүүдэд Тээврийн цагдаагийн албанд нийт 605 дуудлага мэдээлэл ирснээс зам тээврийн ослын шинжтэй 470 дуудлага мэдээллийг хүлээн авч шийдвэрлэжээ. Эдгээр өдөр согтуугаар тээврийн хэрэгсэл жолоодсон 92 жолоочийг илрүүлж, давуу эрх бүхий явган зорчигчид гарцан дээр зам тавьж өгөөгүй 251 жолоочийг МУ-ын ЗТХ-ийн 14.7.38-д заасны дагуу хариуцлага тооцож ажилласан байна.

Ослын улмаас дөрвөн хүн гэмтэж, зам тээврийн ноцтой ослын улмаас  орон нутагт хоёр хүний амь нас хохирсон байна.
Тодруулбал, энэ сарын 10-ны 23:30 цагийн орчимд Архангай аймаг Их-Тамир сум Тайхар баг асфальтан замд Nissan “X-Trail” маркийн машины жолооч Г нь явган зорчигч 59 настай, эрэгтэй Х-г мөргөж амь насын хохироосон.
Мөн өчигдөр 16:40 цагийн орчим Завхан аймгийн Идэр сум,  Дархан-Уул баг “Ацын даваа” шороон замд  Hyundai Mighty маркийн автомашин онхолдож, жолооч 57 настай, эрэгтэй Б амиа алдсан байна.

Нийт замын хөдөлгөөнд оролцогч та бүхэн орон нутгийн замд зорчихдоо тээврийн хэрэгслийн хурдыг тохируулж, техникийн бүрэн бүтэн байдлыг хангаж хөдөлгөөнд оролцох, архи, согтууруулах ундааны төрлийн зүйл хэрэглэсэн үедээ тээврийн хэрэгсэл жолоодож хөдөлгөөнд оролцохгүй байхыг Тээврийн цагдаагийн албанаас анхааруулж байна.