“Инновацийг дэмжих хөтөлбөр”-ийг "ICT EXPO 2020" үзэсгэлэнгийн "Цахим үндэстэн" хэлэлцүүлэгт танилцууллаа. Уг хөтөлбөр нь нийгэмд тулгамдсан асуудлыг  гарааны бизнес хэлбэрээр шийдэж болох төслийг санхүүжүүлж, тэтгэлэг олгох зорилготой юм.
Инновацыг дэмжих хөтөлбөрийн зохицуулагч С.Энхжаргал "Төсөлд оролцох этгээд гарааны бизнесээ эхлээгүй эсвэл эхэлчихсэн ч байж болно. Хамгийн гол нь тэнд инновацлаг шинж байх ёстой. Одоогоор төслийн журам батлагдаагүй байгаа ч төсөөлж байгаагаар нэг төсөлд 90 сая хүртэлх хэмжээний тэтгэлэг олгоно. Ойролцоогоор 15-аас доошгүй төслийг санхүүжүүлэх ба оролцох хүсэлтэй хувь хүн, байгууллагууд "ICT Expo 2020" дээрх ухаалаг төслийн хэсэг дээр ирж бүртгүүлж болно. Мөн онлайн хэлбэрийн зарыг удахгүй зарлана. Бид асуудлыг хэрхэн зөв тодорхойлох тухай сургалт хийх ба сургалтад суусан хүмүүс төсөл санаачлан хамрагдах боломжтой. Шалгарсан төслүүдийг сайжрахад нь туслах хурдасгуур хөтөлбөрүүдийг хийж, аргачлал эзэмшүүлэхийг зорино" гэв.

Инновацийг дэмжих хөтөлбөрийг Монгол Улсын Засгийн газар, Дэлхийн банктай хамтран хэрэгжүүлж байгаа Ухаалаг засаг төслийн хүрээнд санхүүжүүлэх юм.  Хөтөлбөрийн захиалагч, хэрэгжүүлэгч нь Засгийн газрын Хэрэг эрхлэх газар, гүйцэтгэгчээр “Стартап Монгол” ТББ ажиллаж байна.