Төрийн өмчийн 138 сургууль, хувийн хэвшлийн 99 сургууль нийт 275 сургуулийн I-V ангийн 170 мянга орчим сурагчид үдийн цай хөтөлбөрт хамрагддаг. Тэгвэл өнөөдрийн байдлаар 237 сургуульд шалгалт хийжээ.

НМХГ-ын эрүүл мэнд, боловсрол, соёлын хяналтын хэлтсийн дарга Д.Цэнд-Аюуш “Шалгалтын явцад 450 арчдас, уснаас 75 сорьц, хүнсний бүтээгдэхүүнээс 30 дээж авч шинжилсэн. Хяналт шалгалтын явцад зөрчилтэй байсан 35 иргэн, ААН-д 15 сая төгрөгийн торгууль ногдуулсан. Нийслэлийн хэмжээнд төрийн өмчийн 138 сургуулийн 74 буюу 53.6 хувь нь зориулалтын гал тогоотой,  42 хувь нь зориулалтын бус цайны газартай байна. Тухайлбал, Хан-Уул дүүргийн 7, 10, 15, 18, 32, 34-р сургууль, Чингэлтэй дүүргийн 17, 57, 39, 5, 117, 50, 72-р сургууль, Сонгинохайрхан дүүргийн 107, 9, 42, 134-р сургууль, Баянзүрх дүүргийн "Баянзүрх шавь" цогцолбор, 102, 53, 79-р сургууль, Сүхбаатар дүүргийн 45, 71-р сургууль зэрэг төрийн өмчийн сургуулиудын цайны газар нь зориулалтын бус байна.
Хяналт шалгалтад хамрагдсан цайны газрын 67 буюу 28.2 хувь нь мэргэжлийн хяналтын байгууллагад хандалгүй дураараа ажиллаж байсан. Тухайлбал, Чингэлтэй дүүргийн 39, 50, 117, 138, 140, 150-р сургууль, Баянзүрх дүүргийн 126, 87, 137-р сургууль, Сүхбаатар дүүргийн 71-р сургууль, "Шинэ зууны удирдагч" сургууль, "Үй Цай" сургууль, Баянгол дүүргийн "Жишиг эрдэм" сургууль, Хан-Уул дүүргийн аравдугаар сургууль зэрэг төрийн болон төрийн бус өмчийн  сургуулиуд хууль зөрчиж ажиллаж байсан.

Хүнсний түүхий эд бүтээгдэхүүнийг тээвэрлэхдээ зориулалтын тээврийн хэрэгслээр тээвэрлэх ёстой. Шалгалтад хамрагдсан сургуулийн 37.9 хувь нь зориулалтын тээврийн хэрэгсэлгүй байна. Тухайлбал, Чингэлтэй дүүргийн 138, 117-р сургууль, Баянгол дүүргийн "Жишиг эрдэм" сургууль зориулалтын бус тээврийн хэрэгсэлтэй байсан. Эдгээр сургуулийн 75 хувь буюу 31.6 хувь нь хүнс хадгалах нөхцөл хангалтгүй, хүнсний агуулахгүй, хүнс хадгалах зориулалтын сав хэрэгсэлгүй, хөргүүр, хөлдөөгч дутагдалтай. Мөн түүхий эд хүнсний бүтээгдэхүүний гарал үүсэл, чанар аюулгүй байдлын гэрчилгээ, шинжилгээний бичиг зэргийг бүрэн бүрдүүлээгүй зөрчил 50 сургуулиас илэрсэн” гэлээ.