Үндэсний статистикийн хорооноос мэдээлсэн нийт бүртгэгдсэн гэмт хэрэг 2021 оны эхний 10 сард 20,253 болж, өмнөх оны мөн үеэс 889 буюу 4.2 хувиар буурчээ.

Нийт бүртгэгдсэн гэмт хэрэг өмнөх оны мөн үеэс буурахад,

• Өмчлөх эрхийн эсрэг гэмт хэрэг 673 (5.8 хувь),
• Хүний эрүүл мэндийн халдашгүй байдлын эсрэг гэмт хэрэг 181 (2.9 хувь),
• Хөдөлгөөний аюулгүй байдал, тээврийн хэрэгслийн ашиглалтын журмын эсрэг гэмт хэрэг 99 (11.7 хувь),
• Хүрээлэн байгаа орчны эсрэг гэмт хэрэг 70 (12.7 хувь)-иар тус тус буурсан нь голлон нөлөөлжээ.

Харин олон нийтийн аюулгүй байдал, ашиг сонирхлын эсрэг гэмт хэрэг 177 (68.6 хувь)-иар өсжээ.

Энэ оны аравдугаар сард 3,376 хэрэг бүртгэгдсэн нь өмнөх сараас 434 (14.8 хувь)-иар өсөхөд өмчлөх эрхийн эсрэг гэмт хэрэг 409 (23.6 хувь)-иар өссөн нь голлон нөлөөлжээ.

Гэмт хэргийн улмаас учирсан хохирол 2021 оны эхний 10 сард 141.5 тэрбум төгрөг, нөхөн төлүүлсэн хохирлын хэмжээ 63.8 тэрбум төгрөг болж, өмнөх оны мөн үеэс учирсан хохирол 115 (44.8 хувь) тэрбум төгрөгөөр буурч, харин нөхөн төлүүлсэн хохирол 3.1 (5.1 хувь) тэрбум төгрөгөөр өссөн байна.