Махны нөөц бүрдүүлэлт, үнийн тогтвортой байдлын талаар өнөөдөр ХХААХҮЯ-наас мэдээллээ. Энэ үеэр тус яамны сайд З.Мэндсайхан “Коронавирусийн нөхцөл байдлын улмаас манай улсаас мах авахгүй гэсэн шийдвэрийг өнгөрсөн гуравдугаар сард гаргасан тул манай улс махаа экспортолж чадахгүй байгаа.

 Иймээс дотоодын махны худалдааг дэмжих зорилгоор энэ жил төв суурин газарт махны нөөц бүрдүүлэх чиглэлд илүү онцгой ажиллаж байна. Нөөцийн мах бэлтгэлд Засгийн газраас 100 тэрбум төгрөгийн гурван хувийн хүүтэй хөнгөлөлттэй зээлийн эх үүсвэрийг шийдсэн.

Үүнд нийт 17 аж ахуй нэгж хамрагдаж, одоогийн байдлаар 81 тэрбум төгрөгийн хөнгөлөлттэй зээл арилжааны банкуудад гарсан байна. Өнөөдрийн байдлаар үйлдвэрийн агуулахад 6.1 мянган тонн мах нөөцлөгдсөн байна. Энэ жил 15 мянган тонн мах бэлтгэх зорилготой байгаа”гэв.

Харин нөөцийн махны бүрдүүлэлтийн хувьд хонины мах 60 хувь, үхрийн мах 30 хувь, ямааны мах 10 хувь байгаа бөгөөд яамны зүгээс үнийн хөөрөгдөл бий болгохгүйгээр үнийг тогтвортой байлгах тал дээр анхаарч ажиллана гэж ХХААХҮЯ-ны Хүнсний үйлдвэрлэлийн бодлогын хэрэгжилтийг зохицуулах газрын дарга Т.Гантогтох онцлон хэллээ.