"Мандухай сэцэн хатан", "Мөнх тэнгэрийн хүчин дор" зэрэг сэтгэлд шингэсэн уран бүтээлээр  ард түмнийхээ сэтгэлд үлдсэн МУГЖ Ж.Сүххуяг таалал төгсжээ. Өнгөрсөн гуравдугаар сард судасны бөглөрөл оноштойгоор яаралтай хагалгаанд орохоор, ард түмнээсээ хандив гуйж байсан.  Ж.Сүххуяг нь 1960 оны наймдугаар сарын 24-нд мэндэлжээ. Тэрбээр 1982 онд Улсын багшийн дээд сургуулийн Кино драмын ангийг Д.Маамхүү, Б.Мөнхдорж нарын удирдлага дор төгссөн байна.

1977 онд “Давааны цаана даваа” киноны Жаргалын дүрээр уран бүтээлийн гараагаа эхэлсэн байдаг. Үүнээс хойш 20 гаруй кинонд дүр бүтээсэн юм. Тухайлбал 1979 онд “Үүрийн цолмон” киноны Баяраа, 1981 онд “Цэрэг эрсийн жирийн өдрүүд” киноны Амараа, “Хатанбаатар” киноны Сундуйсүрэн, 1984 онд “Тань руу нүүж явна” киноны Очир, “Намрын халуун өдрүүд” киноны Нацагдорж, 1985 онд “Ацаг шүдний зөрүү” киноны Ананд-Очир, 1986 онд “Намар нахиалсан мод” киноны Самдан багш, 1988 онд “Мандухай сэцэн хатан” киноны Батмөнх Даян хаан зэрэг олон кинонд гол болон туслах дүр бүтээжээ.
Монгол Улсын кино урлагт оруулсан хувь нэмрийг нь үнэлэн 2009 онд түүнийг Монгол Улсын гавьяат жүжигчин цолоор шагнасан юм.