Нийслэлийн Мэргэжлийн хяналтын газраас өнөөдөр барилга угсралтын үйл ажиллагаа явуулж буй аж ахуйн нэгж байгууллагуудад хийсэн хяналт, шалгалтынхаа талаар мэдээлэл хийлээ. Иргэдээс ирүүлсэн 48 гомдлын дагуу 327 аж ахуйн нэгж, байгууллагын нийт 426 обьектод төлөвлөгөөт болон төлөвлөгөөт бус шалгалт хийсэн аж.

Шалгалтаар Хан-Уул дүүргийн XI хороо “Хурд майнинг”, Сүхбаатар дүүргийн I хороон дахь “Санкт” зэрэг компани хөдөлмөрийн аюулгүй байдлыг хангаж ажиллах, хүний амь нас, эрүүл мэнд, хүрээлэн буй орчинд шууд болон шууд бусаар хохирол учруулаад байгаа нь нотлогджээ. Эдгээр компанийн барилгын ажлыг прокурорын тогтоолоор түр зогсоогоод байгаа аж.

НМХГ-ын Хөдөлмөрийн хяналтын улсын ахлах байцаагч Г.Гантөмөр “Хяналт, шалгалтаар 341 зөрчил илэрсэн. Зөрчлийг арилгуулахаар 111 аж ахуй нэгж, байгууллагад албан даалгавар хүргүүлж, нийт 134 мянга 850 төгрөгийн торгууль ногдуулсан. Одоо албан даалгаврын гүйцэтгэлийг хянаж байгаа. Барилгын ажил хийж буй газарт хөдөлмөрийн аюулгүй байдлыг бүрэн ханган ажиллах, дотоод хяналт шалгалтыг тогтмол хийж, дагаж мөрдөх, мөн хуульд заасан хэмжээгээр үйлдвэрлэлийн ослоос урьдчилан сэргийлэх төсвийг батлах зэрэг ерөнхий дүрмийг баримталбал үйлдвэрийн осол гарахгүй байх бүрэн боломжтой” гэв.

Мөн энэ сарын 15-ны байдлаар барилгын ослын 25 дуудлага бүртгэгдэж, 11 хүн амиа алдсан байна. Мөн 10 хүн бэртэж, гэмтжээ. Энэ нь өмнөх оны мөн үетэй харьцуулахад 0.8 хувиар буурсан үзүүлэлт аж.