Хэзээ ч сонссон түүнийг танихаар өвөрмөц хоолойтой залуу уран бүтээлч Б.Төрмөнх буюу “Rutuu”-тэй ярилцлаа. Бид түүнийг “ Боловсролтой хулигаан” “Let me be” “Another day” зэрэг дуугаар нь сайн мэдэх билээ.  Мөрөөдлөө орхилгүй гадаадад суралцаж байхдаа ч уран бүтээлээ хийсээр байсан бөгөөд шинэхэн цомгийн ажилдаа орсон гэдгээ ярилцлагынхаа үеэр дурдсан юм.

-Танд энэ өдрийн мэнд хүргэе. Хамгийн анхны уран бүтээлээ хэдэн онд гаргаж байсан бэ. Хэрхэн урлагт хөл тавьж байв?

    -Хамгийн анх Солонгос реппер, сургуулийнхаа найз “Ishday”-тай хамтран “Matter of time” нэртэй уран бүтээл хийж  “Soundcloud” болон "Youtube"  хуудсанд нийтэлж байлаа. Тэр үед анхны уран бүтээл учраас тэр юм болов уу үзсэн хүний тоо нэмэгдэх бүрд баярласан. Үзэлт нь 1000 хүрэхэд л ямар их баярласан гэж санана. Уран бүтээлээ 2015 оноос эхлэн хийсээр байна.

-Тайзны нэр нь “Rutuu” шүү дээ. Яагаад ингэж нэрлэх болсон юм бэ?

    -“Turuu” гэдгийн тонгоргоод "Rutuu" болгосон доо.

-Дууныхаа үгийг өөрөө зохиодог уу?

    -Дууныхаа үгийг өөрөө зохиодог. Тэр дуугаараа юу илэрхийлмээр байгаагаа бодож байгаад зохиодог. Байнга нэг утгатай дуу хийнэ гэж байхгүй учраас тухайн үеийн мэдрэмжээрээ л зохиодог доо.

-Дууны үг зохиох үедээ өөртөө тусгайлан цаг гаргаж, орчин бүрдүүлдэг үү?

    -Ер нь өдөр бүр өөртөө төвлөрч суугаад дууны үг зохих цаг гаргахыг хичээдэг.

-Таны хувьд Солонгос Улсыг ямар зорилготойгоор зорьж байсан бэ.

Зорилго нь биелсэн болов уу?

    -Хөгжим хийж, өөрийгөө хөгжүүлж суралцаад олон зүйл ойлгоод ирэхийг хүссэн. Зорилгууд минь биелсээр байгаа.

-Гадаад суралцаж, амьдарснаар их зүйл сурдаг гэдэг шүү дээ. Үүн дээр ямар бодолтой байдаг вэ?

    -Хувь хүнээсээ хамаараад өөр байх. Гэхдээ миний хувьд их зүйл сурч мэддэг юм шиг санагдсан.

-Гадаадад уран бүтээл хийх Монгол Улсдаа дуу хийхээс өөр байсан уу. Ялгаа гарч байв уу?

    -Ер нь тийм том ялгаа байгаагүй ээ. Надад хаана ч байсан дуу дуулж, уран бүтээл хийж байвал сайхан байдаг. Хоёр улсад уран бүтээл хийхэд ялгаатай байдал гэвэл соёлын ялгаа , ажилд хэрхэн хандаж байгаа байдал нь л жаахан ялгарах байх.

-Олны танил хүний хувьд эерэг сөрөг олон сэтгэгдэл ирдэг байх. Хэрхэн хүлээж авдаг вэ?

    -Ирсэн сөрөг сэтгэгдлүүдийг хүндээр хүлээж авахаа больсон байна. Хааяа нэг сэтгэгдлүүдийг гүйлгэж хардаг.Тогтож нэг бүрчлэн уншаад байдаггүй.

-Тэр сэтгэгдлүүдээс хэзээ мартагддаггүй сэтгэгдэл бий юү?

    - Би 13 настайдаа youtube дээр бүжгийн бичлэгээ нийтэлж байлаа. Тэр үед ирсэн сөрөг сэтгэгдлүүдийг хараад гайхширч билээ. Хүүхэд байсан болохоор тийм сэтгэгдэл авах сонин байсан байх.

-Гадаадад амьдардаг байхдаа ямар үед хамгийн их эх орноо санадаг байсан бэ?

    - Мөрөөдлөө биелүүлэхийн тулд завгүй байдаг байсан. Хэчнээн ядарч байсан ч мөрөөдөл маань байгаа учраас тийм их санаагүй ээ. Харин Монгол дуунуудаа сонсохоор сэтгэл жаахан тиймхэн болдог байсан.

-Дуунуудаа олон хэл дээр дуулдаг шүү дээ. Хэдэн хэлээр ярьж чадах вэ?

    -Би Солонгос, Англи, Орос хэлээр ярьж чадна. Өөрийгөө тийм сайн гэж боддоггүй. Бага ангиасаа хэл сурч эхэлсэн. Ер нь хэл сурах нь миний сонирхол байсан юм болов уу.

-Шантарч байсан үе бий юу?

    -Хүсэл мөрөөдлөө биелүүлэхээр явж байгаа учраас шантарч байгаагүй ээ.

-Багадаа ямар хүүхэд байсан бэ. Дуучин болно гэж бодож байв уу?

    -Их нийгмийн идэвхтэй, тэмцээн уралдаанд их ордог хүүхэд байсан. Бага байхаасаа л урлагийн хүн болохыг мөрөөдөж ирсэн.

-Ирээдүйн зорилго төлөвлөгөөнөөсөө хуваалцахгүй юу?

    -Төлөвлөсөн зүйл олон бий. Одоогоор шинэ цомгоо гаргахаа ажиллаж байна.

-Залуучуудад хандаж хэлэхийг хүсдэг үг байгаа юу?

    -Гоё байгаарай.

-Ярилцлага өгсөнд баярлалаа.

    -Баярлалаа.