Коронавирусийн халдвар Улсын нэгдүгээр төв эмнэлэгт тархсан байж болзошгүй талаар зарим хэвлэл мэдээлжээ. Тодруулбал, коронавирусийн халдвартай ачаа тээврийн жолооч Д-ийн дүү МУБИС-ийн оюутантай уулзсан нэгэн иргэн УНТЭ-ийн гал тогооны ажилтантай холбоо тогтоосон байж болзошгүй нөхцөл байдал илэрчээ. Үүнтэй холбоотойгоор тус эмнэлэгт хөл хорио тогтоож, хавьтал үүсгэсэн байж болзошгүй ажилчдыг тусгаарласан гэх мэдээлэл цацагдаад байгаа юм. 

      Бид энэ талаар УНТЭ-ийн хэвлэлийн төлөөлөгчөөс тодруулахад “Одоогийн байдлаар манай эмнэлэгт хөл хорио тогтоогоогүй бөгөөд гал тогоо хэвийн ажиллаж байна.Эмнэлгийн амбулатори үзлэгээр өвчтнүүдээ үзэж байгаа. Хатуу дэглэмийн хөл хориотой байгаа учраас хаалганыхаа тоог цөөлсөн. Гэхдээ хавьтал болсон байж магадгүй гал тогооны ажилтныг тусгаарласан гэдэг нь үнэн. Түүний ойрын хавьтлыг нь тогтоогоод тусгаарласан гэсэн. Гэхдээ энэ талаар манай халдвар судлалын эмчээс тодруулаарай” гэв. Бид энэ талаар УНТЭ-ийн халдвар судлалын эмчээс тодруулахад “Мэдээлэл өгөх боломжгүй” гэлээ.

Хавьтал болсон байж магадгүй гал тогооны ажилтныг тусгаарласан гэдэг нь үнэн. Түүний ойрын хавьтлыг нь тогтоогоод тусгаарласан гэсэн