МУСТА, жүжигчин Г.Нарансолонгийн төрсөн өдөр өнөөдөр тохиож байна. Монголын авьяас билиг дүүрэн, үзэсгэлэнтэй эмэгтэй жүжигчдийн нэг түүнийг бид "Эмоци" продакшны тайзны бүтээлүүдээс харахаас гадна дэлгэцнээ бүтээсэн намдуухан, ухаалаг, жавхаалаг дүрүүдээр нь мэдэх билээ. Оюутан ахуй цагаасаа "Х-Түц" продакшнд ажиллаж, алдарт  "Сэргээш"-ээс эхлэн тайз, дэлгэцнээ гарч өөрийн өнгө төрхтэй олон сайхан дүр бүтээсэн. Тэр дундаа "Харьд одсон бүсгүйн заяа", "Мөрөөдлийн хөлөг онгоц", "Миний хөрш чөтгөр" киноны дурлалт бүсгүйн дүрийг онцлохгүй байх аргагүй.

         Энгийн даруу гоо, зөөлөн дүрүүд түүнийх байдаг. Бүр түүнээс ч зоригтой, өөрийгөө өмнөх дүрүүдээсээ илүү эвдсэн дүр нь "Солонго үүл", "No Rules-2" киноноос харагдсан. Тэгэхээр уран бүтээлчийн хувьд аль ч дүрийг торохгүй гаргаж, мэргэжлийн үзүүлж чадах чадвар, туршлага дүүрэн уран бүтээлч тэр мөн билээ. Продакшндаа ч дүү нартаа зөвөөр үлгэрлэж, залуучуудтайгаа олон сайхан шинэ уран бүтээлийг хүргэж, улам ч чамбайрсаар байна. Түүнд төрсөн өдрийн мэнд хүргэж, уран бүтээлийн халгисан их амжилт хүсье.