Хакухо М.Даваажаргал "Монгол хаан" жүжгийн Япон Улс дахь соёлын элч төлөөлөгч боллоо

2025-09-03, 126

Монгол Улсын Хөдөлмөрийн баатар, гавьяат тамирчин хакухо М.Даваажаргал “Монгол хаан” жүжгийн Япон Улс дахь соёлын элч төлөөлөгч боллоо. “Монгол хаан” жүжгийн төслийн баг Япон Улсын Токио хотноо наймдугаар сарын 28-ны өдөр хэвлэлийн бага хурал хийж, Японы мэргэжлийн сумогийн 69 дэх их аварга, Монгол улсын Хөдөлмөрийн баатар, гавьяат тамирчин М.Даваажаргал “Монгол Хаан” жүжгийн Япон Улс дахь соёлын элч төлөөлөгч болсныг албан ёсоор зарлалаа.

Хэвлэлийн бага хуралд жүжгийн ерөнхий найруулагч Б.Баатар, гүйцэтгэх продюсер А.Баярцэцэг, хамтарсан продюсер Рюүо Э.Санчирболд, Э.Баясал болон “Монгол Хаан” жүжгийн соёлын элч Хакухо аварга нар оролцжээ. 1000 жилийн түүхтэй Японы үндэсний сумо бөхөд 30-аас дээш түрүүлсэн хоёр аварга байдаг бол 1187 даваа авч 45 удаа түрүүлж, Японы эзэн хааны цомыг авсан цор ганц бөх нь хакухо М.Даваажаргал юм. Тэрбээр “Монгол хаан” жүжгийн соёлын элчийн хувьд Монгол сумочид хоёр улсыг холбох гүүр болж байсан бол уг жүжиг тэрхүү гүүрт соёлын тулгуур нэмж байгаад баяртай байгааг илэрхийлээд 2025 оны сумогийн Аки, Кюшү баше хоёрын дундуур аравдугаар сард Токио болон Нагояа хотноо тоглох гэж буйг онцоллоо.

Өмнөх жилүүдэд Монгол, Их Британи, Сингапурын дэлхийн тайзнуудад тоглогдож, мэргэжлийн шүүмжлэгчид, үзэгчдээс өндөр үнэлгээ авсан, Монгол Улсын Хөдөлмөрийн баатар, Ардын уран зохиолч, Төрийн шагналт, Соёлын гавьяат зүтгэлтэн, яруу найрагч Бавуугийн Лхагвасүрэнгийн “Тамгагүй Төр” буюу“Монгол хаан” жүжиг нь 124 сая хүн амтай, Азийн тэргүүлэх зах зээл болох Японд амжилттай нэвтэрч, театрын зах зээлд Азийг төлөөлөх амжилттай төсөл болж чадаж байгааг ийнхүү жил бүр батлан харуулж байна.

Түүнчлэн энэ жил Монголын Үндэсний Их Баяр Наадмаар Япон Улсын Цог Жавхлант Эзэн хаан Нарухито, Эрхэм дээд хатан Масака нар Монгол Улсад айлчлах түүхэн жилтэй давхцаж Япон улс даяар Монголоор амисгалсан цаг мөчийн араас ирэх сард Монголын 70 гаруй шилдэг уран бүтээлчид Арлын Их Наран улсыг зорих гэж буй нь Монгол, Япон хоёр улсын соёлын хамтын ажиллагааны түүхэнд тод мөрөө үлдээх үйл явдал болох нь гарцаагүй. “Монгол хаан” жүжгийн тасалбар өдгөө Японы зах зээл дээр борлогдож байгаа бөгөөд ирэх аравдугаар сарын 10-20-нд Токио хотноо, 24-26-нд Нагояа хотноо тус тоглох гэж байна.

Хакухо М.Даваажаргал "Монгол хаан" жүжгийн Япон Улс дахь соёлын элч төлөөлөгч боллоо

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.