Монгол Улсын Ерөнхийлөгч Х.Баттулга өнөөдөр төрийн өндөр дээд одон, медаль гардууллаа. Монгол Улсын Ардын жүжигчин цолоор МУГЖ, дуучин С.Батсүх энгэрээ мялаасан юм.

Тэрбээр шагналаа гардаж авсныхаа дараа “Миний гурван бадаг дуунд аз жаргал, амжилт минь байжээ. 1993 онд МУГЖ гэдэг цолыг Монгол Улсын Ерөнхийлөгч П.Очирбатаас авч байсан бол Ардын жүжигчин хэмээх эрхэм цолыг тав дахь Ерөнхийлөгч Х.Баттулгаас гардаж авлаа. Миний аз жаргал, дурсамж, сайхан цаг цугацаа эргэж хөвөрсөн, бодогдсон өдөр байна. Монголынхоо ард түмэнд маш их баярлалаа. Миний сэтгэл рүү үргэлж алга ташдаг учраас дуулахаас өөр аргагүй байдаг шүү. Монголчуудтайгаа олон жил дуулахын тулд эрүүл байх хэрэгтэй гэдгээ ойлгож байна. Анх МУГЖ цолыг зүүчихээд зогсож байхдаа “100 сая төгрөг аваад дампуурчихсан” юм шиг бодогдож, хамаг булчин ажиллаж байсан. Өнөөдөр бас дахиад энэ том цолыг хүртэж, “Ард түмэндээ өртэй боллоо” гэж бодож байна. Миний дууг сонсдог бүх хүнд талархлаа. Сайн хүний хэлсэн ганцхан өгүүлбэр хүний амьдралыг өөрчидөг. Завхан аймгийн Хөгжимт бүжгийн театрт ажилд орох үеэр “Завханы театртаа ч байдаг юмуу, эсвэл барилгад явах уу” гэж бодож байсан. Тэр үед Хөдөлмөрийн баатар Ц.Намхайнямбуу сонинд өгсөн ярилцлагадаа “Москва чинь миний хотон дотор л байсан юм байна шүү дээ” гэж хэлсэн байсан. Тэгээд тэрнээс хойш “Ямар ч гэсэн үр шимийг нь үзье” гэж бодоод өнөөдөрт хүрч ирлээ” гэв.