Тулгар төрийн 2234 жил, Их Монгол Улс байгуулагдсаны 819 жил, Үндэсний эрх чөлөө, тусгаар тогтнолоо сэргээн мандуулсны 114 жил, ардын хувьсгалын 104 жилийн ойн үндэсний их баяр наадмын нээлтийг найруулагч, Төрийн соёрхолт Н.Наранбаатар найруулсан билээ.

       Тэрбээр "Энэ жилийн наадмын нээлтийн гол утга учир мөнхөд гэрэлтэх Монгол гэх үгэндээ оршиж байгаа юм. Мөнхөд гэрэлтэхийн тулд бид эх оронч байх ёстой. Эх орноо сэтгэлдээ тээхийн тулд харин эцэг эхээ хайрлах ёстой юм. Иргэн бүр эх орноо хайрлаж чадвал бидний улс мөнхөд гэрэлтэ юм гэдгийг энэ жилийн наадмын нээлтээр хүргэхийг хичээлээ. Мэдээж наадмын нээлтээр бидний өв соёл, үнэт зүйл, бахархал, нандигнал, эрхэмлэх ёсон бүхэн шингэсэн байх ёстой. Монголчуудын филисофи юунд оршиж, бидний үндсэн язгуур юу байна гэхээр саруул сайхан ухаанаар ертөнцийг тольдох аваас мэдэхгүй, чадахгүй юм байхгүй билээ. Бид хэн байлаа, одоо хэн болчихоод байна, ирээдүйд хэн болох тухай дор бүрнээ бодох цаг болжээ. Мэдээж баясаж цэнгэл бий. Гэхдээ баясал цэнгэлийн ард ухаарал өөрөө мөнхөд дагаж явах ёстой. Эх орон гэдэг эх хүний хэвлийгээс эхэлдэг юм шүү дээ. Тэгээд тодорхой хугацаанд тээгдээд эх дэлхий, этүгэн минь тосоод авдаг. Тэр цагаас эхлэн бид хүн болохын тухай бодож эхэлдэг. Тиймээс эх орон гэх зүйлийн нарийн нандиныг энэ удаагийн наадмаар ойлгуулахыг хичээлээ. Энэ жилийн наадмын нээлтэд 2500 уран бүтээлч оролцлоо. Олон сайхан хүний хөдөлмөр зүтгэлээр бүтлээ” гэв.