Жүжигчин О.Дөлгөөний төрсөн өдөр өнөөдөр тохиож байна. Түүнтэй бид "Амьдралд тавтай морил", "Хайрын эрэлд" зэрэг киноны дүрээр нь анхлан танилцаж байсан бол өдгөө тайз, дэлгэцийн дүрүүд нь улам арвижин олон сайхан бүтээлийн эзэн болсон билээ. Энэ өдрүүдэд гэхэд тэр Б.Лхагвасүрэн зохиолчийн "Тамгагүй төр" жүжгийн Гүргэл хатны дүрийг амжилттай бүтээж буй юм.

           Тэрбээр СУИС-ийн Кино драмын ангийг жүжигчин мэргэжлээр 2008-2012 оны хооронд төгсөж, 2017-2019 онд Калифорни мужийн Сан-Франциско хотын Урлагийн академийн их сургуульд жүжигчин болон кино зохиолчоор магистрийн зэрэг хамгаалсан байдаг. Гадагшаа сурахаасаа өмнө тэр оюутны ширээнээс хошин урлагийн тайзан дээр авьяас билгээ сорьж, "Мөрөөдлийн театр"-т ажиллаж байгаад УДЭТ гэх айлд мөн багтаж, "Ромео, Жульетта" жүжгийн Жульетта, "Гамлет"-ын Офелиа тэргүүтэй дэлхийн сонгодог жүжгийн дүрүүдэд ч амжилттай тоглож байсныг үзэгчид мэдэх билээ. Ийн ажиллаж байхдаа тэрбээр 2015 оны "Гэгээн муза" наадмаас Жульеттагийн дүрээрээ шилдэг эмэгтэй гол дүрийн шагнал хүртсэн байдаг. Ингээд харахаар О.Дөлгөөн жүжигчин дэлгэцийн бүтээлээс гадна хошин урлаг, драмын тайзнаа ч амжилттай гялалзаж, өнөөдөр ч улам чадварлаг, чансаатай уран бүтээлч болон төлөвшиж яваа гэдгийг тоглосон бүтээл бүрийг нь үзэж байгаа хэн бүхэн бахархан хэлэх биз ээ. Түүнд төрсөн өдрийн мэнд хүргэж, уран бүтээлийн өндөр амжилт хүсье.