Нэрт утга зохиол судлаач, шүүмжлэгч, яруу найрагч, доктор П.Батхуягийн нэрэмжит "Тайз, дэлгэцийн бүтээлийн уран сайхны шүүмж"-ийн улсын IX уралдааны шилдгүүд тодорлоо.

П.Батхуяг нь монголын театр болоод кино урлагийн шүүмжийн олон бүтээл хэвлүүлж, “Эсрэг цаг” хэмээх шүүмжийн цуврал бүтээлээр уншигчид хийгээд уран сайхны шүүмжийн сэтгэлгээнд томоохон хувь нэмэр оруулсан соён гэгээрүүлэгч юм.

Шүүмжийн уралдааныг “Мэргэжлийн шүүмж”, “Шилдэг шүүмж – оюутан” гэсэн хоёр ангилалаар явуулсан бөгөөд “Сити” Их сургуулийн Жүжиглэх урлагийн багш, судлаач Х.Чойдогжамц “Найруулагч Г.Ган – Очирын хайрын концепц” шүүмжээрээ тэргүүн байрт шалгарчээ. Харин дэд байрт судлаач Б.Мөнх-Эрдэнэ “Бидний нүцгэн үнэн хийгээд үйлийн үрийн тойрог дахь бус зүйлсийн тухай”, гутгаар байрт судлаач Б.Батцоож “Сэхээтний төөрөгдөл буюу дахин хэлмэгдсэн Пагмадулам” зэрэг шүүмжээрээ шалгарсан байна.

Харин оюутны төрөлд “Сити” их сургуулийн Урлагийн сургуулийн Найруулах урлагийн IV курсын оюутан Б.Бадруун “Урагш нэг, хойш хоёр алхсан Улсын Драмын эрдмийн театр” шүүмжээрээ тэргүүн байрыг хүртжээ.