Алдарт хөгжмийн зохиолч В.А.Моцартын хамгийн сүүлийн бүтээл "Увдист лимбэ" дуурийг тоглоно. Тодруулбал, хоёр бүлэг, 11 үзэгдэлтэй тус дуурийг 2025 оны нэгдүгээр сарын 25, 26-ны 17:00 цагаас Дуурь бүжгийн эрдмийн театрын тайзнаа тоглох юм. 

        Анхны тоглолт нь 1791 оны есдүгээр сарын 30-нд Вена хотын Ауф дер Виден театрт болсон байна. Харин энэхүү дуурийг Монголд анх удаа 1993 онд ДБЭТ-ын ерөнхий найруулагч Г.Эрдэнэбаатар найруулан тавьжээ.

  Зохиолын сэдвийг Моцартын үед амьдарч байсан Австрийн урлаг, нийгмийн нэрт зүтгэлтэн Шиканедер гэгч К.Виландагийн (1733-1813) "Жинистан буюу сайхан сэтгэлт хатагтай ба сүнснүүд" хэмээх уран зөгнөлт туульсын түүврээс авсан байдаг байна. Энэ түүвэр 1786-1789 онд хэвлэгдэн гарсан байжээ. Шиканедер энэ сэдвийг тэр үеийн ардын шидэт аман зохиолтой уялдуулан холбож чадсан юм. Цомнолыг анхнаасаа герман хэл дээр бичсэн бөгөөд үйл явдал, баатруудыг нууцлаг ертөнцийг эргэцүүлсэн маягтай, уран сэтгэмжийн аргаар бүтээжээ. Үлгэрийн гэмээр энэхүү гэнэн сэдвийг Моцарт хөгжүүлэн хүний зан араншин, ёс суртахууны асуудлыг хөндсөн гүн гүнзгий философийн эрэгцүүлэл болгон хөгжим бичсэн гэдэг.