"Х-ТҮЦ" продакшны жүжигчин Т.Бархүүгийн төрсөн өдөр өнөөдөр тохиож байна. Түүнийг бид тайз, дэлгэцийн олон сайхан дүрээр нь мэдэх билээ. Дэлгэцнээ  "Миний хөрш чөтгөр", "Худалч залуу", "Найз", "Болсон явдал", "Танхай тээгч", "Шуугиан таригч", "Ууртай шувууд", "Гэрлэн дохио", "Нүдээ аниад төсөөл", "Аз жаргал", "Солиот эх", "Алтан өндөг", "Гэрч", "Овгорын овгор", "Базарваань", "Хөөрхөн ээжтэй охин", "Төлөөс", "Хайрыг битгий гомдоо", "Эмэгтэйн кэйс", "Ээж" зэрэг бүтээлийн гол болон туслах дүрд тоглосон бол тайзнаа "Сэрүүн хасын нууц", "Аянгын бороо", "Гэм зэм", "Зохиолгүй амьдрал" зэрэг жүжгийн дүрээр нь бид мэдэх билээ. Мөн өчигдөрхөн нээлтээ хийсэн OI энтертайментын ээлжит бүтээл болох "III дахь цохилт" киноны Ялалтын дүрд тоглосон байна.

      Тэрбээр "СУИС-ийг төгсөөд театрын жүжигчин болох байх гэж багш, өөр бусад хүн ч хэлдэг байсан. Харин арван жилийнхэн намайг жүжигчин болно гэхэд гайхдаг байлаа. Яалт ч үгүй 2004 оноос 16 жил явсан болохоор хүмүүс хүлээн зөвшөөрчихдөг юм байна. Би арван жилдээ бүрэг ичимхий, хаалттай хүүхэд байсан. Тийм бүрэг ичимхий хүүхэд гэнэт “би жүжигчин боллоо” гэхээр гайхах нь аргагүй л дээ. Төгсөх курст ангийнхаа багшдаа хэд хэдэн жүжгийн санал хэлдэг. Багш шавь нараа мэдэх учраас “миний хүү энэ жүжгийг сонго, энэ дүрд тогло” гээд хэлж өгдөг. Би А.П.Чеховын “Иванов” жүжгийн Львов эмчийн дүрд тоглож байсан. “Цахлай” жүжигтэй адилтгаж болохуйц сэтгэхүйн драм л даа маш хүнд жүжиг" гэж ярьсан байдаг.  Түүнд төрсөн өдрийн мэнд хүргэж, уран бүтээлийн амжилт хүсье.