“Говь хянганд тулалдсан нь” киноны Ю.Цэдэнбал, “Үхэж үл болно Чингис хаан”, “Суварган цэнхэр уулс”, “Мандах нар­ны туяа”, “Амьдралын нахиа”, “Төрийн сүлд өршөө”, “Сайн уу амьдрал минь”, “Боолын гэрээ”, “Ээждээ л үнсүүлэх сэн”, "Гэм зэм" зэрэг дэлгэц, тайзны 160 гаруй бүтээлд дүр бүтээсэн Монгол Улсын Төрийн соёрхолт, гавьяат жүжигчин Ц.Төмөрбаатарын төрсөн өдөр өнөөдөр тохиож байна.

           Тэрбээр 1956 оны энэ өдөр Ардын жүжигчин Цагааны Цэгмидийн хүү болон мэндэлжээ. Түүний дүү Ц.Төмөрхуяг, Ц.Төмөрсүх нар жүжигчин бол эгч Ц.Уртнасан нь концейртмейстр юм. Тэрбээр аавынхаа 51 насанд, дүү Ц.Төмөрхуяг нь 58 настайд нь мэндэлжээ. “Хүний амь” киноны Эрдэнийн дүрд 1976 онд тоглож, жүжигчиний гараагаа эхэлжээ.

          Төмөрбаатар 1978 онд УБИС-ийн Кино драмын анги, 1984 онд Москвагийн Кино урлагийн дээд курс, 1986-1988 онд Марксизм-Ленинизмийн оройн дээд сургуулийг жүжигчин, найруулагчийн мэргэжлээр тус тус төгсжээ. Тэрбээр сургуулиа төгсөөд 1978-1997 онд Хүүхэд залуучуудын театрт жүжигчнээр ажиллаж байв. 1999-2000 онд КУДС-д багш, 2000-2002 онд Драмын театрт жүжигчин, 2002 оноос театр, хөгжмийн "Мюзик-Холл" дээд сургууль, 2010 оноос одоог хүртэл "ОУБТ ЗОХИОМЖ" дээд сургуульд багшилжээ.