Жүжигчин О.Самданпүрэв "Тамгагүй төр" жүжгийн Ханхүүгийн дүрд тоглохоор болжээ. Тэрбээр анх “Байрны ах” киноноос л үзэгчдийн хараанд өртөж эхэлсэн уран бүтээлч. Түүнээс хойш “Нэг талын тасалбар”, “Зориг”, “Залхуус”, “Ахлах сургууль”, “1990”, “Сүүдэрт ургасан цэцэг”, “Цасан хүн”, “Бяцхан чөтгөрийн хүсэл”, “Чиний төлөө”, “37-р Точка”, “Ээж ээ зорино”, “Ноён эмэгтэй”, "Бэхэн зүрх" зэрэг киноны гол болон туслах дүрээр үзэгчдийг дагуулан овоо ч хол яваа. Хол гэдэг нь чамгүй хэдэн уран бүтээлийн олзтой чамбай уран бүтээлч болон өсөж яваа залуу жүжигчдийн нэг яах аргагүй мөн. Түүнээс гадна театрын студи ангийн жүжигчнээр ажиллаж, “Нүцгэлээч”, “Хаадын хаан” зэрэг тайзны бүтээлд ч оролцоод амжсан. Өнгөрсөн хавар "Про" театрын уран бүтээл болох найруулагч О.Итгэлийн "Шадар гурван цэрэг" жүжигт тоглосон билээ. 

            Багаасаа л урлагт дуртай байсан тухайгаа “Багаасаа л урлагт дуртай хүүхэд байсан. Миний хүүхэд нас Офицеруудын ордны 67-р байрны  гадаа тоглож л өнгөрсөн дөө. Сагс, хөлбөмбөг зэрэг спортод хорхойтой хүүхэд байлаа. Мөн үзэх дуртай киноныхоо үлгэрийн баатраар өөрийгөө төсөөлнө” гэж ярьсан байдаг. Зурах авьяастай, магад сайн зураач, загвар бүтээгч болоод ажиллаж, амьдрах бүрэн боломж байсан ч тайзан дээр бүжиглэж, зургийн талбайд байх дуртай хүсэл мөрөөдлийнхөө араас зогсолтгүй урагшилж, өөрийн гэсэн олон сайхан бүтээлд тоглож, хичээж яваад нь том амжилт хүсье.