Ардын дуучин, СТА Д.Бурмаа Хөдөлмөрийн гавьяаны улаан тугийн одон хүртлээ. Түүнийг бид "Хар торгон хамжаар", "Бөхийн гэргийн дуу", "Аргамжаа", "Уянга цагаан хуруу", "Дууны сайхан Юндэн", "Дөрвөн уул" зэрэг олон сайхан дуугаар нь мэдэх билээ. Увс аймгийн Тэс сумын харьяат тэрбээр 14 хүүхэдтэй айлын отгон охин. Тэрбээр МУИС-ийг урлаг судлаач мэргэжлээр төгсөж, дараа нь СУИС-ийн уртын дуучны ангид элссэн гэдэг. Ганцаараа дуулахаас гадна тэрбээр дуучин А.Мөнхбат, Л.Банзрагч, Б.Уранзаяа, О.Гансувд нартай хамтран дуулдаг билээ.

      Тэрбээр "Төрийн дээд одон хүртсэндээ баяртай байна. Монголын ардын урлагийн их буян байх гэж бодож байна. Би 2000 оноос хойш 24 жил ардын болон нийтийн дуунуудыг дуулж, шинэ залуу үед ардын урлагийг сурталчилан таниулах үйл хэрэгт өөрийнхөө хувь нэмрийг багахан хэмжээнд ч болов оруулсан байх гэж боддог. Цаашид ихийг хийж бүтээх чин хүсэл эрмэлзлэлтэй байна. Нийт ард түмэндээ дэлхийд ганцхан монгол наадмаараа дэнж хотойтол сайхан наадаарай" гэв.