Үндэсний их баяр наадмыг зохион байгуулах хороо энэ оны дөрөвдүгээр сарын 18-нд хуралдаж, Ардын хувьсгалын 103 жилийн ойн баяр наадмын нээлт, хаалтын ёслолыг “Монгол туургатан” театрын найруулагч Ц.Батнайрамдал найруулах шийдвэр гарсан. Энэ жилийн наадмын нээлтийг “Эх дэлхий, эх оршихуй цадиг” сэдвийн дор зохион байгуулах байна.

        Найруулагч Ц.Батнайрамдал нь  Төв аймгийн Баяндэлгэр сумын харьяат. 1989 онд Төв аймгийн “Монгол туургатан” театрт дагалдан жүжигчнээр ажиллаж байгаад 1990 онд Соёл урлагийн их сургуулийн кино драмын ангид элссэн байна. Түүнийг Улсын багшийн их сургуулийн Кино драмын ангид тэнцэхэд, СУИС байгуулагдаж, анхны элсэлтээ авч байжээ. Ардын жүжигчин, Хөдөлмөрийн баатар, Төрийн шагналт Ц.Гантөмөр багшийнхаа удирдлагад төгссөн тэрбээр багшийнхаа тухай бахархан ярих дуртай. Жүжигчнээр төгссөн ч найруулагчаар ажиллах болсон тухайгаа “Багш минь намайг хоёрдугаар курст байх үеэс л миний жүжигчин гэхээс илүү найруулагч болбол яасан юм бэ.Чамд найруулагчийн нэг юм байна гэж хэлж байсан. Тухайн үе ангийнхныхаа тоглолт, номерыг найруулж өгдөг байсан болохоор тэр байх. Оюутан байхаас л ангийнхан маань намайг” Найраа” гэж хочилдог болсон байсан” гэнэ.

Ингээд сургуулиа төгсөөд “Монгол туургатан”театртаа Ч.Лодойдамбын “Хугараагүй ноён нуруу”, О.Шийтэрийн “Туулсан зам” жүжгийг найруулсан байна.  1996 оноос Дарханы театрт ерөнхий найруулагчаар ажиллаж, хань жүжигчин П.Мөнх-Одтойгоо танилцаж байжээ.

           Тэрбээр 2008 оноос “Сити” их сургуульд багшилж эхэлсэн бөгөөд СУИС-аас санал тавьсны дагуу Төрийн шагналт найруулагч Н.Наранбаатартай хамтран хөгжимт театрын жүжигчний ангийг төгсгөсөн гэдэг.

       2014-2018 онд Хүй долоон худагт Соёлын наадмыг найруулсан. 2018 онд Монгол төрийн их баяр наадмын хүндэтгэлийн концертыг найруулсан бол 2019 онд Монгол Улсын Ерөнхийлөгчийн ивээл дор “Холливуд Монголд” төслийн ерөнхий найруулагчаар ажилласан. Харин өнгөрсөн жил Төв аймгийн 100 жилийн ойн баяр наадмыг найруулсан юм. Тэрбээр томоохон наадмаас гадна олон арга хэмжээ, тоглолтуудыг ч зохион байгуулсан туршлагатай байна. Онцолж “Манекен” жүжгийг дурдахгүй өнгөрөх аргагүй. Тэрбээр 2014 онд Улсын драмын эрдмийн театраас долоон найруулагч, долоон өөр жүжгийн төслийг санаачлан хэрэгжүүлсний хүрээнд “Манекен” жүжгийг найруулан хүргэсэн юм. Энэхүү жүжиг нь хотоос алслагдмал төмөр замын нэгэн өртөөнд аж төрдөг хоёр бүсгүйн амьдралыг харуулдаг.

Найруулагч  Ц.Батнайрамдал Үндэсний баяр наадмын хамгийн бага хөрөнгө оруулалтын саналыг дэвшүүлсэн буюу 2.9 тэрбумаар наадмын нээлт, хаалтыг хийх төсөв оруулж ирсэн байна.