Төрийн шагналт, Соёлын гавьяат зүтгэлтэн Дарма Батбаярын зохиол Төрийн соёрхолт, найруулагч Н.Наранбаатарын найруулгаар Улсын хүүхэд залуучуудын тайзнаа тавих гэж буй “Хайрыг хайрла” жүжгийн Туулын дүрд СТА, жүжигчин Д.Оюунтуул тоглохоор болжээ. Түүнийг бид “Овжин охид” киноны адтай сэргэлэн Мишээлийн дүрээс нь эхлэн мэдэх билээ. Мөн хошин урлагийн тайзнаа олон сайхан дүрийг үзэгчдийн сэтгэлд хоногшуулсан. Нийслэлийн 51 дүгээр сургуулийг 1997 онд төгсөж, СУИС-ийг 2001 онд жүжигчин мэргэжлээр төгссөн. Сүүлийн жилүүдэд тэрбээр уран бүтээлд оролгүй нам жим байж байгаад ийнхүү “Хайрыг хайрла” жүжгийн дахин тавилтаар Туулын дүрээр үзэгчидтэй уулзах гэж байна.