Жүжигчин Ч.Очгэрэлийн тоглосон онцлох таван киног хүргэж байна.

МАРТАГДАШГҮЙ НАМАР

Түүнийг бид анх фото модель гэдгээр нь мэдэх билээ. Түүнээс хойш “Universe best songs” наадмын оролцогчоор дуулах авьяасыг нь таниж, дараа нь “Мартагдашгүй намар” киноны Туулын дүрээр “уулзсан”. Хайр дурлалынхаа төлөө зоригтой байж, эцсээ хүртэл тэмцэж байгаа Туулын дүрийг тэр чадварлаг гаргасан. Даруу мөртлөө аливаад яс чанар Очгэрэлийн тоглосон кинонуудын дүрээс илт байдаг.

СОДУРА

    “Мартагдашгүй намар” кинонд тоглосны дараа жил нь “UBS” телевизээс түүнд “Содура” кинонд тоглох урилга ирсэн байна. Улирал дамнан зураг авсан энэхүү бүтээлд тэрбээр өвлийн зураг авах үед нь хөл хүндтэй байсан юм билээ. Содура бол гүн тайгын охин. Хайраас болж шархалсан ч дахин хайр сэтгэлтэй учирч, мөн л дахин шархалдаг. Гэхдээ тэр энэ бүхнээс амьдралыг, бусдыг жинхнээсээ хайрлахыг сурдаг.

 ГОВИЙН ДОМОГ

 Эрх танхи, дураар, өөрийнхөөрөө, зорьсон зүйлийнхээ араас бат явж чаддаг түүний дүрүүдээс арай ондоо, Ч.Очгэрэлээс илүүтэй ур чадвар шаардсан, мөнхүү өөр уран бүтээлчийг бидэнд харуулсан бүтээл бол “Говийн домог” киноны Эсэргэн хатны дүр. Үрийг нь төрүүлэхгүйгээр хааны хатан байна гэдэг хатуугаас хатуу амьдрал гэдгийг түүний дүрээс харж болно. Тэр хэрээр харгис, хатуу, хорон муу санаандаа идэгддэг. Ийм нэг хатын эсрэг талын дүрийг тэр бүтээсэн.

ЦАГААН ЭРЭГ

      Тэрбээр түрүү жил найруулагч Ц.Амартүвшингийн бүтээл болох “Цагаан эрэг” киноны гол дүрд тоглосон. “Анх намайг “Цагаан эрэг” киноны зохиолтой танилцахад цаг үеэ оносон сэдэьтэй бүтээл шиг санагдсан. “Цагаан эрэг” киног бид арай өөр өнгө төрхтэйгээр гаргахаар анхнаасаа зорьсон. Нуршсан их текст яриагүй, киног үзэхэд үйл хөдлөл, өрнөл нь аваад явчихаар бүтээл болсон” гэнэ. Түүний намуухан мөртлөө дотогш тоглолтыг үзэгчид мэдэх билээ. Үүний нэг нь дүрийг эндээс харж болох юм.

ОРЛОН ТОГЛОГЧ

      Сүүлд харин тэр найруулагч Б.Амарсайханы “Орлон тоглогч” киноны Хулангийн дүрд тоглолоо. Хүсэл мөрөөдлөө дагасан зураач эмэгтэй. Гэхдээ хайр сэтгэл нь төдийлөн санаснаар нь бүтээгүй. Гэсэн ч тэр хайрласан хэвээр байсан. Олон жилийн дараа хайртай хүн нь өөр рүү нь ирсэн ч хэдийнэ гэр бүлтэй болсон, өөрөө ч мөн гэр бүлтэй болсон байна. Гэсэн ч эцсээ хүртэл хайр дурлалынхаа төлөө үнэнч байхаар шийддэг ч мөн л бэрхшээл тулгарна.