Төрийн шагналт, Ардын уран зохиолч, яруу найрагч Ш.Сүрэнжавын "Нар шингэдэггүй юм" шүлгийн түүврийн нээлт өнгөрсөн гурван сард болсон билээ. Энэхүү номыг зохиолч, яруу найрагч Ц.Буянзаяа сонгон эмхэтгэж, Ш.Сүрэнжав зохиолчийн зээ охин Х.Сайхансанаа, хэл шинжлэлийн ухааны доктор Д.Нямдорж нар ариутга шүүснээр хэвлүүлсэн байна. Номд, их зохиолчийн урьд өмнө ном, бүтээлдээ хэвлүүлж байгаагүй богино шүлгээс түүвэрлэн оруулснаараа онцлог байна. Ингээд бид "Нар шингэдэггүй юм" номоос дараах таван шүлгийг онцлон хүргэж байна.

                  ***     

Сэтгэлийн ганц амраг минь

Гурван зуун жар хоногийн цаана сууна

Сэмхнээ түүндээ очъё гэтэл 

Зүүднээс өөр морьгүй.

                       ***

Далай, далай давалгаална

Сэтгэлийн минь эрэгт ирж эвхэрнэ

Сэтгэл, сэтгэл давалгаална

Далайн эрэгт тулж номхорно.

                   ***

Цаг гэдэг

Чиний залуу насыг аван, аван

Цаашаа давхилдаж байгаа морьд юм

Цаг гэж юу юм бэ

Чамайг залхууран хэвтэхэд чинь 

Эргэн эргэн харж

Инээмсэглэсээр явчихаж буй бүсгүй юм.

                           ***

Атаархал

Давчуу цээжинд дүрэлзсэн бяцхан түймэр

Атаархал

Далдын хар малгатай эмгэн шулам

Атаархлыг амталбал

Гашуунаас гашуун бохь

Атаархлыг хатгавал

Гар зүсэх хутга.

                    ***

Үерхэнэ гэгч өнгө нэгтэй эд