“Монгол театр”-ын уран бүтээлчид “Клеопатра” түүхэн сэдэвт сонгодог жүжгийг тайзнаа амилуулж буй. Бид тус жүжигт тоглож буй залуу жүжигчдийг онцлон хүргэж байна.

ЖҮЖИГЧИН Х.СУМЪЯАДОРЖ БУЮУ РОМЫН ЗАЛУУ ЖАНЖИН ОКТАВИАН

          “Клеопатра” сонгодог жүжгийн ромын залуу жанжин Октавианы дүрд залуу жүжигчин Х.Сумъяадорж тоглож байна. Түүний хувьд сургуулиа төгсөөд удаагүй байгаа бөгөөд анх удаа тайзны бүтээлд тоглож буй юм. Харин “Хиртээгүй сарнай”, , “Бүлэг”, “Дайрлага”, “Бид нэг гэр бүл” зэрэг киноны гол болон туслах дүрд тоглосныг үзэгчид андахгүй. Тэр дундаа “Бид нэг гэр бүл” киноны хэрсүү, ухаалаг, тэвчээртэй, хайр дурлалдаа үнэнч Итгэлийн дүрд тоглосон. Тэрбээр “Итгэл надтай дотогшоогоо зан чанараараа их ойр байсан” гэсэн байдаг. Үнэхээр ч Итгэлийн дүрээр тэр үзэгчдэд илүүтэй ойртож, даруу төлөв мөртлөө хэрсүү ийм нэг залуу уран бүтээлч урлагт орж ирж байгааг мэдэрч, түүнийг ямар дүрд тоглохыг хүлээх болсон.

ЖҮЖИГЧИН Э.ЭНХГЭРЭЛ БУЮУ ХАТНЫ ҮНЭНЧ ТУСЛАХ ХАРМИАНА

       Тэрбээр “Клеопатра” хатны үнэнч туслах Хармианагийн дүрд тоглож байгаа бөгөөд “Монгол театр”-ын залуу уран бүтээлч юм. Солонгос Улсад сургууль төгсөж ирсэн бөгөөд түүхэн сэдэвт сонгодог жүжигт анхны дүрээ авч байгаагаараа онцлог юм. Тус жүжиг нь өчигдрөөс эхлэн Улаанбаатар чуулгын тайзнаа тоглогдож байгаа бөгөөд Улсын драмын эрдмийн театрын жүжигчин Н.Баярмаа Клеопатра хатны дүрийг бүтээж буй юм.

ЖҮЖИГЧИН А.НЯМЦЭРЭН БУЮУ РОМЫН ЖАНЖИН АХИЛЛ

         “Клеопатра” жүжгийн ромын жанжин Ахиллын дүрд тоглож буй жүжигчин А.Нямцэрэн нь 2012 онд “Сити” их сургуулийг найруулагч Ц.Батнайрамдалын удирдлагад жүжигчин мэргэжлээр төгсжээ. Тэрбээр өмнө нь Сергей прокофьевийн зохиол “Петя Чоно хоёр” хөгжимт жүжгийг 2015 онд найруулан тавьсан байна. Мөн “Нил цагаан” жүжгийн ассистент найруулагч болон дууны найруулагчаар мөн давхарж ажилласан байна. Тэрбээр энэхүү жүжгийн тухай “Монголын урдаа барьдаг, бидний хэлдгээр томчуудтай нэг тайзан дээр мөр зэрэгцэн зогсоно гэдэг нэр төрийн хэрэг байлаа. Их туршлага, ухаан суулгасан хэдэн сар өнгөрч байна. Цаашид жүжиг тавих хүсэлтэй болохоор тэр мөрөөдөл рүү алхах эхний шатаар нэлээд өндөр алхлаа гэж олзуурхаж байна” гэсэн юм.