Клеопатра" түүхэн сэдэвт сонгодог драмын жүжиг  хоёрдугаар сарын 28-ны "Улаанбаатар театр"-ын тайзнаа нээлтээ хийлээ.Их Британийн алдарт жүжгийн зохиолч Оскар, Нобелийн шагналт Жорж Бернард Шоугийн "Цезарь Клеопатра хоёр", суут жүжгийн зохиолч Уильям Шекспирийн "Антони Клеопатра хоёр" жүжгийн зохиолоос сэдэвлэн "Монгол театр" Клеопатра сонгодог жүжгээр театрын урлагт анхны уран бүтээлээ нээж байгаа билээ. Тиймээс бид энэ удаа "Клеопатра" жүжгийн зарим уран бүтээлчдийг танилцуулж байна.

             Тус жүжгийн ерөнхий найруулагчаар СТА А.Чингүн, ерөнхий продюсер Ч.Чулуунсүх, төслийн зөвлөх Ж.Дэмбэрэлсайхан, гүйцэтгэх продюсероор СТА, жүжигчин Э.Идэрболд ажиллажээ.Мөн хөгжмийн зохиолчоор МУУГЗ С.Сансаргэрэлтэх, ерөнхий зураачаар СТА Ч.Батболд, хувцасны зураачаар СТА Д.Ариундэлгэр, хөдөлгөөний найруулагчаар СТА Д.Энхбаатар, тулааны найруулагчаар, СТА Т.Төгсөө, туслах найруулагчаар А.Нямцэрэн, нүүр хувиргагчаар М.Сонинцэцэг, график дизайнераар Б.Лувсандагва нар тус тус ажилласан байна. Харин "Клеопатра" жүжгийг эх хэлнээ орчуулагч Н.Пүрэвдагва, Э.Нямдулам нар хөрвүүлсэн билээ. 

ОРЧУУЛАГЧ Н.ПҮРЭВДАГВА

             Жүжгийн зохиолч, орчуулагч, профессор Н.Пүрэвдагва гуай биднийг энэ удаа “Клеопатра”-тай уулзуулж байна. Дэлхийн шилдэг, заавал унших ёстой романуудын нэгд тооцогддог Оросын алдарт зохиолч Лев Толстойн “Анна Каренина” зохиолыг Монголын тайзнаа анх удаа амилуулсан зохиолч гэдгээр нь Н.Пүрэвдагва гуайг уншигчид мэднэ. Тэрбээр өмнө нь “Кихот ноён”, “Амьгүй албат”, “Фауст” зэрэг дэлхийн сонгодгуудыг тайзны бүтээл буюу жүжгийн зохиол болгосноос гадна У.Шекспир, Карло Гольдони, Карло Гоцци, Бернард Шоу, Бертольд Брехтийн бүтээлийг эх хэлнээ хөрвүүлсэн авьяаслаг нэгэн юм.

          Мөн тэрбээр энэ жил Жеральд мартин “Г.Г.МАРКЕС” зохиолоороо МЗЭ-ээс зохион байгуулдаг “Алтан Өд” шагнал хүртсэн билээ.

СТА, ЕРӨНХИЙ НАЙРУУЛАГЧ А.ЧИНГҮН

   СТА, найруулагч А.Чингүн 2019 онд УДЭТ-ын уран бүтээлчид О.Элбэгтөгсийн “Надтай үлдээч” зохиолыг жүжиг болгон тайзнаа амилуулж байсан. Мөн Ардын хувьсгалын 102 жилийн ой, Үндэсний их баяр наадмын нээлт, хаалтын ёслолын үйл ажиллагааны 1-р найруулагч буюу уран бүтээлийн найруулагчаар УДЭТ-ын жүжигчин, найруулагч СТА А.Чингүн болон УДЭТ-ын баг, бүрэлдэхүүн ажилласан билээ.

МУУГЗ, ХӨГЖМИЙН ЗОХИОЛЧ С.САНСАРГЭРЭЛТЭХ

          Тэрбээр Урлагийн Гавьяат Зүтгэлтэн Ч.Сангидоржийн хүү билээ. С.Сансаргэрэлтэх 1989 онд Хөгжим Бүжгийн Дунд сургуулийг төгөлдөр хуурчийн мэргэжлээр улаан дипломтой дүүргэж, мөн жилдээ Москва хотын Чайковскийн нэрэмжит хөгжмийн дээд сургуульд хөгжмийн зохиолчийн мэргэжлээр ЗХУ-ын төрийн соёрхолт, Ардын жүжигчин Алберт Леманы удирдлага дор суралцаж, 1995 онд тус сургуулийнхаа аспирантурт дэвшин суралцаж 1997 онд Урлагийн Магистр цолтойгоор төгсжээ. Мөн тэрбээр Испанийн Мадрид хотын Хааны дэргэдэх хөгжмийн академид 1997-1999 онуудад үргэжлүүлэн суралцаж төгсгөсөн байна. Тэрбээр Чайковскийн нэрэмжит хөгжмийн дээд сургуулийг Монголын хөгжмийн зохиолчдоос төрийн соёрхолт Л.Мөрдөрж, С.Гончигсумлаа нарын дараа дүүргэсэн гурав дахь хөгжмийн зохиолч юм.

            МУУГЗ С.Сансаргэрэлтэх Найруулагч С.Бямбын “Хүсэл шунал”, “Алсын удирдлага” зэрэг киноны хөгжим, У.Шекспирын “Гамлет” зэрэг жүжгийн хөгжмийн зохиолчоор ажиллаж байсан. Мөн түүний зохиол Хятад, Испани, ОХУ, Польш, Америкт өөрийнхөө концертыг тоглож, Норвеги, Бельги зэрэг олон оронд зохиол нь тоглогдсон байдаг.

СТА, ЖҮЖИГЧИН ГҮЙЦЭТГЭХ ПРОДЮСЕР Э.ИДЭРБОЛД

                 СТА, жүжигчин Э.Идэрболд Дорноговь аймгийн “Саран хөхөө” театрын захирлаар ажилладаг. Уншигч та бүхэн түүнийг “Амьдрал чиний төлөө”, “Цэн тогоруу” киноны дүрээр нь андахгүй таних биз ээ. Тэрбээр найруулагч А.Чингүн, жүжигчин Н.Баярмаа нартай хамтран "Монгол театр"-ыг үүсгэн байгуулсан бөгөөд анхны бүтээл нь "Клеопатра" жүжиг юм. Энэхүү жүжгийг хэрхэн сонгох болсон талаар тэрбээр "Египетийн хатан хаан Клеопатраг мэдэхгүй хүн үгүй. Тэр эмэгтэй байгуулсан гавьяа ч их бий. Анхлан эмэгтэйчүүдэд үнэртэй ус, уруулын будаг гэж зүйлийг таниулсан. Ганц үүгээр ч зогсохгүй түүхэндээ эр зоригтой, дайчин эмэгтэй. Энэ ч утгаар бид анхны бүтээлээрээ сонгосон. Тусдаа театр байгуулж бүтээл хүргэх бидний мөрөөдөл байсан. Ингээд мөрөөдлөө биелүүлж байгаадаа баяртай байна" гэсэн юм.