Хүн төрөлхтний гоо үзэсгэлэнгийн олимп гэгддэг “Miss World” тэмцээн 71 дэх жилдээ Энэтхэг Улсын Нью Дели хотноо албан ёсоор 2024 оны хоёрдугаар сарын 20-ны өдөр эхэлсэн. Энэхүү тэмцээнд Монгол Улсыг төлөөлөн СТА Үндэсний урлагийн их театрын гоцлол бүжигчин Б.Болор оролцож байна.

          Тэрбээр "Монголын сайхан бүсгүй-2023” гоо сайхны 16 дахь наадмын алтан эрдэнийн титмийн эзэн, “Miss world Mongolia 2023” тэмцээний үндэсний ялагч болж, Дэлхийн миссийн тэмцээнд оролцох эрхээ авсан. Б.Болор Үндэсний урлагийн их театрт гоцлол бүжигчнээр ажиллаж бөгөөд 2018 онд Монгол Улсын консерваторыг бүжгийн жүжигчин мэргэжлээр, 2023 онд СУИС-ийг бүжиг дэглээч, найруулагчаар тус тус  төгссөн билээ.

            Түүний загварын гараа 2019 онд “Манжуур”-ын мисс шалгаруулах тэмцээнд  оролцсоноор эхэлж байсан. Мөн тэрбээр "Монголын Их Хатад" бүжгэн туульс, “Тэнгэрийн хутагт” зэрэг бүжгэн жүжгийн гол дүрийг бүтээсэн.

             Тэрбээр хэвлэлд өгсөн ярилцлагадаа “Энэ жилийн “Монголын сайхан бүсгүй” шалгаруулах тэмцээний бүртгэл явагдаж байгааг мэдээгүй байсан. Намайг БНСУ-д тоглолтоор явсан хойгуур ээж минь энэ тэмцээнд бүртгүүлчихсэн байсан. Ээж минь мисс болох мөрөөдлийг биелүүлж өглөө. Дэлхийн миссийн тэмцээнд эх орноо төлөөлөн оролцож байгаадаа баяртай байна” гэсэн байдаг.

            “Miss World” тэмцээн нь дэлхий дахины энх тайван, эв нэгдлийг сурталчлах, хүмүүнлэгийн далайцтай том ажлуудыг хийх, мөн улс үндэстнүүдийн соёлыг дэлхий дахинд сурталчлан таниулахад чухал үүрэг гүйцэтгэдэг онцлогтой. Энэхүү тэмцээнд эх орноо төлөөлөн оролцож буй СТА бүжигчин, мисс Б.Болорт амжилт хүсье.