Дэлхийн хөгжмийн өв олон улсын уралдаанд монгол оюутан амжилттай оролцжээ. Тодруулбал, ОХУ-ын Хөгжмийн Академийн магистратурын оюутан Баатарын Доржнамжин нь "World Music Heritage" олон улсын дуурийн гоцлол дуулаачдын VI дахь удаагийн наадамд амжилттай оролцож тэргүүн байр эзэлсэн байна. 2024 онд "Дэлхийн хөгжмийн өв сан" ( World Music Heritage) олон улсын нэр хүндтэй энэхүү уралдааныг Оросын нэрт хөгжмийн зохиолч Н.А. Римский Корсаковын мэндэлсний 180 жилийн ойд зориулан ОХУ-ын Ерөнхийлөгчийн ивээл дор Москва хотноо зохион байгуулжээ.

            МУСТА, СУИС-ын Хүндэт профессор Валягийн Бүрэнжаргалын шавь Баатарын Доржнамжин нь өнгөрсөн 2023 оны тавдугаар сард Москва хотноо болсон Оросын нэрт хөгжмийн зохиолч, ОХУ-ын Ардын жүжигчин, И.Дунаевскийн нэрэмжит Олон улсын дуурийн дуулаачдын XVII дахь удаагийн уралдааны хоёр төрөлд тэргүүн болон дэд байр эзэлсэн юм. Мөн оны арваннэгдүгээр сард Бүгд Найрамдах Чечень Улсын Филармонид ЗХУ-ын Ардын жүжигчин Муслим Магомаевын дурсгалд зориулсан "Орфей-2023" VI олон улсын уралдаан- наадмын дипломант болж байсан юм. Тэрбээр ОХУ-ын сонгодог урлагийн нэрт найруулагчийн  В.А.Моцартын “Фигарогийн хурим” дуурийн Альмавива гүнгийн дүрийг бүтээсэн.