“Амьддаа бие биенээ хайрла...” гэж тэр бичсэн. “Аяа хүнд туслах агшин хайрла.:.” ч гэсэн.

            Бусдыг хайрлах, хүнд туслахын гэрлийг хүний орчлонд буй биеэрээ тусгаж, өөрөөрөө үлгэрлэж, төр, нийгэм, түмэн олонд ч тустай, дэмтэй, эх оронч байсан билээ, тэр. Ийн өгүүлэхийн учир өнөөдөр Монголын төр, нийгмийн зүтгэлтэн, цогт эх оронч, яруу найрагч Очирбатын Дашлбалбар хэмээх эрхмийн мэндэлсэн өдөр тохиож байна. Хэдийгээр тэр бидний ертөнцөөс мордоод удаж байгаа ч энд байгуулсан гавьяа, хүмүүсийг тэтгэсэн амьдрах итгэл, урам зоригоороо үүрд “амьд” оршиж, өнөө ч бид шүлэг, бүтээлийг нь шимтэн уншиж байгаа. Тэрбээр “Оддын аялгуу”, “Гол ус намуухан урсана”, “Гэрэлт хайр”, “Зүүдний мөнгөн шувуу”, “Бурханы мэлмий”, “Цаг хугацааны гуниг буюу орон зай дахь дүрсүүд” зэрэг яруу найргийн таван цуврал бүтээл хэвлүүлсэн нь өдгөө ч бидний мөнхийн эрэлт, сөхөж харах оюун санааны том бүтээлүүд хэвээр байна.  

         Эдгээр номын дотогш нэвтэрвэл, “Амьддаа бие биенээ хайрла”, “Тэнгэр шиг бай”, “Залуус дүү нартаа хүргэх шүлэг”, “Эх орон”, “Эх хэл минь”, “Эх орноо бид үр ачдаа хүлээлгэж өгнө” зэрэг үргэлжийн хүнд тусалсан, урам зориг хайрласан, ухаарал, гэгээрэл нэмсэн бүтээл өөдөөс гэрэлтэн, гялбалзаж, уншсан хэнд ч нэгийг өгөх шүлгүүд инээмсэглэн угтана.

          Түүний амьдрал, бүтээлийн гол санаа бурхан, шашин, соёлыг хамгаалах, дэлгэрүүлэх, сэргээх бөгөөд Монголын газар шороо, нийгмийн баялаг, ард түмнийхээ язгуур эрх ашгийг хамгаалахад чиглэж байжээ. Балбар найрагч  1957 онд  Сүхбаатар аймгийн Наран сумын нутагт  төрсөн бөгөөд ЗХУ-ын Омскийн Хөдөө аж ахуйн техник мэргэжлийн сургууль, Москвагийн Горькийн нэрэмжит утга зохиолын дээд сургууль 1985 онд төгссөн байдаг. Дунд сургуульд байхаасаа шүлэг бичиж эхэлж. Их сургуулиа төгсөөд  Монголын Зохиолчдын Эвлэлийн гадаад харилцааны мэргэжилтэн, “Утга зохиол урлаг” сонины ажилтан, 1990 оноос МҮЧЗЭ-ийг байгуулж тэргүүлэгч даргаар нь ажилласан байна.

       Дараа нь 1992 оны шинэ Үндсэн хуулийг батлалцсан Ардын их хурлын депутат байжээ. Мөн тэрбээр 1992 онд Сүхбаатар аймгийн 63-р тойрогт Улсын Их Хурлын гишүүнээр сонгогдож, төр түшилцэж явсан юм. Түүнийг найрагч олон нөхөд, ойр дотных нь даруу төлөв, дөлгөөн зантай хүмүүн байсныг дурсан өгүүлдэг байсан бөгөөд ёстой л өөрийнхөө “Гол ус намуухан урсана” бүтээл шигээ Монголын утга зохиолын салбарт намуухан урсаж, цогтой тэмцэж, дорвитой дуугарагч байсан юм.