-ЕРӨНХИЙ САЙД Л. ОЮУН-ЭРДЭНЭ КОРОНАВИРУСИЙН  ЭСРЭГ ВАКЦИН ТАРИУЛСАН АНХНЫ МОНГОЛ ХҮН БОЛЖ,  БҮХ НИЙТИЙН ВАКЦИНЖУУЛАЛТ ЭХЭЛСЭН НЬ-

         Монгол Улс БНЭУ-ын буцалтгүй тусламжаар Их Британийн AstraZeneca вакцинаас 150 мянган тун, БНХАУ-ын буцалтгүй тусламжаар Verocell вакцины 300 мянган тун, ОХУ-ын буцалтгүй тусламжаар Спутник-V вакцины 20 мянган тун,  АНУ-аас 50 мянган тун Pfizer вакцин хүлээн авсан. Улмаар  2021 оны хоёрдугаар сарын 23-ны өдөр Ерөнхий сайд Л.Оюун-Эрдэнэ AstraZeneca вакцины анхны тунг тариулж, иргэдээ  вакцинжуулалтад идэвхтэй хамрагдахыг уриалав.

ҮЗВЭР, ҮЙЛЧИЛГЭЭ, ОРОН НУТГИЙН ХӨДӨЛГӨӨНИЙГ НЭЭВ

         Дотоодод бүх нийтийн вакцинжуулалт эхэлсэнтэй холбоотойгоор Засгийн газар, УОК-ын 2021 оны хоёрдугаар сарын 25-ны өдрийн хуралдааны шийдвэрээр кино театр, үсчин, үзвэр, үйлчилгээний байгууллагын үйл ажиллагааг 50 хувиар эхлүүлэх шийдвэр гаргалаа. Мөн тус хуралдаанаар гуравдугаар сарын 1-нээс хот хоорондын хөдөлгөөнийг нээх шийдвэр гаргаж байв.

“КОВИДГҮЙ ЗУН” УРИА ЗАРЛАЖ,  ВАКЦИНЖУУЛАЛТЫГ ЭРЧИМЖҮҮЛСЭН

        • 2021 оны дөрөвдүгээр сарын 5-ны өдөр Засгийн газраас “Ковидгүй зун” уриаг зарласан. “Ковидгүй зун” урианд иргэд, аж ахуйн нэгжүүд нэгдэж, бүх нийтийн вакцинжуулалтыг эрчимжүүлж, байв.

ХАТУУ ХӨЛ ХОРИО ТОГТООЖ, ИРГЭН БҮРД 300 МЯНГАН ТӨГРӨГ ОЛГОВ

          • Монгол Улсын Засгийн газар 2021 оны  дөрөвдүгээр сарын 8-нд ээлжит бусаар хуралдаж, 15 хоногийн хугацаанд хатуу хөл хорио тогтоох шийдвэр гаргасан. Ингэхдээ өмнөх хатуу хөл хорио бүрд яригдаж байсан нөхөн олговрын асуудлыг хэлэлцэж баталсан. Улмаар Засгийн газрын шийдвэрийн дагуу “Оюутолгой” ХХК-д ногдуулсан торгууль, нөхөн татварын алданги болох их наяд төгрөгийн татварын орлогоос Монгол Улсын иргэн бүрд 300 мянган төгрөгийн нөхөн олговрыг хатуу хөл хорионы үеийн нэг удаагийн дэмжлэг хэмээн олгосон.

ӨДӨРТ БҮРТГЭГДЭХ ХАЛДВАРЫН ТОО ДУНДЖААС ДАВЖ, ЦАР ТАХЛЫН ДЭГДЭЛТ ХЯНАЛТАА АЛДЛАА

         Хатуу хөл хорио тогтоосон өдрөөс буюу 2021 оны дөрөвдүгээр сарын 10-нд коронавирусын 689 тохиолдол шинээр бүртгэгдсэн. Дараагийн өдөр нь 831 тохиолдол, 12-нд 704 тохиолдол шинээр бүртгэгдэж, коронавирусийн тархалтын хурдац нэмэгдсэн. Улмаар дөрөвдүгээр сарын 21-ний өдөр 1263 болж, өдөрт бүртгэгдэх шинэ тохиолдлын тоо 80 орчим хувиар өссөн талаар Эрүүл мэндийн яамнаас мэдэгдэж байв.

КОРОНАВИРУСИЙН ЭСРЭГ ВАКЦИН ТАСАРСНЫГ, БНХАУ, ОХУ, БНЭУ-ЫН ТАЛТАЙ ДИПЛОМАТ ХЭЛЭЛЦЭЭ ХИЙЖ, ОРУУЛЖ ИРЭВ

            •2021 оны тавдугаар сарын 1-нд Монгол Улсад татан төвлөрүүлээд байсан коронавирусийн эсрэг вакцин дуусч, хомстолд ороод байв. Үүнтэй холбоотойгоор Засгийн газраас БНХАУ, ОХУ, БНЭУ-ын талтай дипломат хэлэлцээ хийж, вакцин татаж авчрахаар болсон.

Хэлэлцээний дүнд Засгийн газраас БНЭУ, БНХАУ, БНСУ, ОХУ, Бельги Улсаас Pfizer, AstraZeneca, Sinopharm, Спутник-5 гэсэн дөрвөн төрлийн 1,750,640 хүн тун вакцин татан авав.

АРДЫН ХУВЬСГАЛЫН 100 ЖИЛИЙН ОЙ, ҮНДЭСНИЙ ИХ БАЯР НААДМЫГ ЦУЦЛАВ

         Засгийн газар 2021 оны долдугаар сарын 2-нд ээлжит бусаар үндэсний их баяр наадмыг хойшлуулах асуудлаар хуралдаж, баяр наадмын бүх төрлийн үйл ажиллагааг цуцалсан. Үүнтэй холбоотойгоор уяачид морьтойгоо эсэргүүцэл илэрхийлж, наадам зохион байгуулахыг шаардаж байсан бол иргэд, аж ахуйн нэгжүүд баяр наадмыг цуцлахыг дэмжиж, оронд нь аж ахуйн нэгжийн үйл ажиллагааг нээхийг шаардаж, төв талбайд жагсаал хийв.

ЕРӨНХИЙ САЙД ЯПОНД АЙЛЧИЛЖ, ЗУНЫ ОЛИМПЫН НЭЭЛТЭД ОРОЛЦЛОО

       Ерөнхий сайд Л.Оюун-Эрдэнэ анхны албан айлчлалаа Япон Улсад 2021 оны долдугаар сарын 23-25-нд өдөр хийсэн. Айлчлалын үеэр “Токио-2020” зуны олимпын наадмын нээлтэд оролцож, Япон Улсын Ерөнхий сайд Ёшихидэ Сүгатай албан уулзалт хийв. Тус айлчлалын дараа Японы Засгийн газраас 2.3 сая хүн тун Pfizer вакциныг буцалтгүй тусламжаар илгээсэн юм.

СУРГУУЛЬ, ЦЭЦЭРЛЭГ, ҮЗВЭР, ҮЙЛЧИЛГЭЭНИЙ БАЙГУУЛЛАГЫН ҮЙЛ АЖИЛЛАГААГ НЭЭВ

       • “Ковид-19” цар тахал дэгдсэнтэй холбоотойгоор боловсролын салбар 2019-2020 оны хичээлийн жилийн 47 хувь, 2020-2021 оны хичээлийн жилийн 68 хувьд хаалттай байсан. Үүний улмаас манай орон дэлхийд хамгийн урт хугацаанд боловсролын салбарын үйл ажиллагаагаа зогсоосон улсуудын нэг болоод байв. Улмаар Засгийн газар боловсролын салбарын асуудлаар хуралдаж, 2021 оны есдүгээр сарын 1-нээс боловсролын салбарын үйл ажиллагааг танхимаар хичээллүүлэх шийдвэр гаргасан. Үүнээс хоёр сарын дараа буюу арваннэгдүгээр сарын 1-нээс урлаг, соёл, спортын үйл ажиллагааг танхимын 50 хувийн дүүргэлттэйгээр эхлүүлэх шийдвэр гаргасан юм.

ЦАР ТАХЛЫН ҮЕИЙН ХЯЗГААРЛАЛТУУДЫГ ЦУЦАЛЖ, ЭНГИЙН АМЬДРАЛЫН ХЭМНЭЛД ШИЛЖСЭН НЬ

         • 2022 оны хоёрдугаар сарын 14-ний байдлаар улсын хэмжээнд зорилтот бүлгийн 92 хувь, нэмэлт гуравдугаар тунд 52 хувь, дөрөвдүгээр тунд 90 орчим мянган хүн хамрагдсан үзүүлэлтэд тулгуурлан Засгийн газраас цар тахлын үеийн хязгаарлалтуудыг цуцлах шийдвэр гаргаж, энгийн амьдралын хэмнэлдээ шилжихийг уриалав.