Төрийн соёрхолт, "Камертон" хамтлагийн ахлагч, дуучин Д.Болдын төрсөн өдөр өнөөдөр тохиож байна. Тэрбээр энэ жил 44 нас хүрч байгаа бөгөөд хөгжмийн зохиолч, продюсераар мөн давхар ажиллаж байгаа юм. Түүний аав Доржсүрэн Эрдэнэт хотын анхны  архитектор,  профессор хүн байсан бол  ээж нь дуурийн дуучин хүн байжээ. Түүний үеэл ах нь  Никитон хамтлагийн дуучин Б.Батчулуун юм. Харин өвөө нь Ардын жүжигчин, төрийн соёрхолт, нэрт морин хуурч Г.Жамъян гуай юм. 

    Дуучин Б.Болд 1986 онд Хөгжим бүжгийн коллежийн хийл хөгжмийн ангид элсэн орж 1998 онд хийлч, төгөлдөр хуурч мэргэжлээр төгссөн байдаг. 1995 онд “Камертон” хамтлагийг байгуулж одоо хүртэл рок поп урсгалаар уран бүтээлээ туурвиж байгаа бөгөөд 2005 оноос эхлэн бие даасан уран бүтээлийн гараагаа эхэлсэн түүхтэй.

  Тэрбээр 2006 онд өөрийн B Production-г үүсгэн байгуулсан хамтлагуудын цомгийн продюсерээр ажилласан байдаг. Харин 2011 онд Монгол Улсын Ерөнхийлөгч асан Ц.Элбэгдорж Монголын язгуур урлагийг рок поп урсгалаар баяжуулж байгааг нь үнэлж Төрийн шагнал хүртээсэн юм.

2016 онд “Channel 11” телевизээ байгуулан олон улсын стандартад нийцсэн Английн тоног төхөөрөмжөөр тоноглож, дуу хөгжим, кино, рокестр зэрэг бүх төрлөөр бичлэг хийхээр тохижуулсан байна. Мөн "Улаанбаатар фитнесс" клубыг нээж, бэлтгэлээ хийсний дараа багшийнхаа зөвлөсөн, эрүүл хоолыг зооглох "B room" кафег ч мөн нээжээ. 2018 онд Монгол HD ТВ-р цацагдсан The Voice of Mongolia шоуны 1-р улирлын дөрвөн шүүгчийн нэгээр сонгогдон ажилласан. Тэрбээр мөн “Би чамд хайртай-2” киноны гол дүрд ажилласан билээ.