"Монос" группийн Ерөнхийлөгч, Монгол Улсын Хөдөлмөрийн баатар, академич, төрийн шагналт Лувсангийн Хүрэлбаатарын "Бүтээлч Моносчууд бүгдийг тэгээс", "Ер бусын хайр" гэсэн хоёр номын нээлт өнгөрсөн даваа гарагт  "Интерном" номын их дэлгүүрт боллоо. 

       Тэрбээр номын нээлтийнхээ баярын үеэр "Номын нээлт маань сайхан боллоо."Бүтээлч Моносууд бүгдийг тэгээс" ном маань 2020 онд хэвлэгдсэн. Ковид-19 цар тахлын улмаас хоёр жилийн дараа нээлтийг нь хийж буй минь энэ. Мөн "Ер бусын хайр" гэдэг тууж, өгүүлллэгийн ном бичсэнийхээ нээлтийг  хамт хийж байна. Номын маань нээлтэд бизнесийн салбарын нөхөд маань ирлээ, зохиолч найз нар маань ирлээ. "Монос" бол Монголын хувийн хэвшлийн хамгийн анхны хувийн аж ахуйн нэгжүүдийн нэг юм. Өөрөөр хэлбэл Моносын түүх гэдэг бол Монголын хувийн хэвшлийн үүсч хөгжсөн түүх гэж хэлж болно. Иймээс ч  "Бүтээлч Моносууд бүгдийг тэгээс" номонд Монос групп яаж үүсч, хөгжсөн, алдаа, оноо нь юу байв?  гэдгийг өгүүлсэн. Яагаад ийм амжилтанд хүрэв гэдгийг харуулсан энэ номыг гол нь бизнес эрхэлж байгаа залуучуудад зориулж бичсэн юм. Ер нь багадаа гоё уран зохиолын бүтээл уншаад, түүндээ хөтлөгдөөд ийм сайхан зохиол бичдэг хүн болох юмсан гэж мөрөөддөггүй хүүхэд байхгүй байх. Миний амьдралын зам арай өөр байж, судалгаа, эрдэм шинжилгээ, бизнес гэж явсан ч энэ сонирхлоо орхихгүй явсаар өнөөдөр үргэлжилсэн үгийн чиглэлээрх анхны номоо гаргаж байна" гэв.