• Өнөөдөр 2026-06-29

"Мөнх тэнгэрийн хүчин дор" киноны 30 жилийн ойд зориулан "Кинонд амилсан уран зураг" үзэсгэлэн нээгджээ

2022-10-24,   1215

     “Мөнх тэнгэрийн хүчин дор” киноны 30 жилийн ойд зориулан "Кинонд амилсан уран зураг" үзэсгэлэнг Монгол арт галерейд энэ сарын 21-нд нээлээ. Тус үзэсгэлэнд “Мандухай цэцэн хатан", "Мөнх тэнгэрийн хүчин дор" зэрэг түүхэн киног бүтээсэн Төрийн шагналт зураач Б.Пүрэвсүхийн болон киноны зураачдын уран бүтээлүүдээс дэлгэжээ.
 
     Тэрбээр 1948 онд Төв аймгийн Авдарбаян суманд төрсөн. 1971-1977 онд ЗХУ-ын И.Е.Репинийн нэрэмжит уран зураг, уран баримлын академид ЗХУ-ын Ардын зураач В.И.Орешниковын урланд суралцаж төгссөн. 1989 онд Төрийн шагнал хүртсэн юм.
 
    Урлаг судлагч О. Сосор “Б.Пүрэвсүх зураачийг 1985 онд "Мандухай цэцэн хатан" хэмээх түүхэн сэдэвт дөрвөн ангит томоохон киноны ерөнхий зураачаар томилсон нь Монголын түүх, угсаатны зүйн өргөн хүрээтэй, гүн мэдлэгтэй байсныг үнэлсэн хэрэг юм. Энэ тухай Урлагийн гавьяат зүтгэлтэн, зураач Ц.Байды, Ардын уран зохиолч Б.Лхагвасүрэн нар “Нэвтэрхий толь мэт мэдлэгтэй зураач” гэж дүгнэсэн байдаг. Үнэхээр ч түүний тал бүрийн мэдлэг, хувийн цуглуулга дахь ховор нандин гэрэл зураг, ном зохиолууд киног бүтээх чухал эх сурвалж болсныг сүрлэг тансаг орд харш, эд хогшил, ихэс дээдэс, цэрэг дайчид, харц ардын хувцас гээд кинонд зориулсан олон эх загвар харуулна. Энэ бүхнийг түүх, соёлын үнэт дурсгалын баримт дээр тулгуурлан, гайхамшигтай өнгө зохируулж зурсан хийгээд тэдгээрийг арьс үс, шир, сур, мод, металл, өнгө бүрийн торго дурдан зэрэг бодит хэрэглэгдэхүүнд буулгаж, уран нарийн бүтээлгэснээр 1989 онд “Мандухай цэцэн хатан” киногоороо Монгол Улсын Төрийн шагнал хүртсэн билээ” гэв.

   Зураач Б.Пүрэвсүхийн уран сангийн тосон будаг, усан будгийн зураг, тайз дэлгэцийн 1000 орчим бүтээлүүд Уран зургийн галерей, Армийн музей, Үндэсний түүхийн музей, "Цагаандарь" арт галерей, "Түмэн эх" чуулга, аймгуудын орон нутгийн музейнүүд болон үр хүүхдүүд, урлаг сонирхогчдын хувийн цуглуулгад хадгалагдаж байна.

Төрийн шагналт ерөнхий зураач Б.Пүрэвсүхийн болон киноны зураачдын бүтээлүүдийг танилцуулж байна.

"Мөнх тэнгэрийн хүчин дор" киноны 30 жилийн ойд зориулан "Кинонд амилсан уран зураг" үзэсгэлэн нээгджээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.