Шинжлэх ухааны доктор, профессор Ш.Паламдоржийн “Мэдээллийн дайн, түүний стратеги, тактик” номын нээлт өнгөрсөн баасан гарагт боллоо. Үндэсний Батлан хамгаалахын их сургуульд 38 жил багшаар ажиллаж, шинжлэх ухааны  олон ном, бүтээл туурвисан тэрбээр шинэ номынхоо нээлтийг хийхээс гадна бусад бүтээлээ мөн танилцууллаа. Бид түүнтэй номын нээлтийнх нь үеэр ийн ярилцлаа.

-50 ОРЧИМ НЭГ СЭДЭВТ БҮТЭЭЛ, 200 ГАРУЙ ӨГҮҮЛЭЛ, 70 ГАРУЙ НОМЫН РЕДАКТОР ХИЙСЭН-

-Танд юуны өмнө шинэхэн номынхоо нээлтийг хийж байгаад нь баяр хүргэе. Батлан хамгаалах салбарын эрдэм шинжилгээний судалгааны байгууллагад хэчнээн жил ажиллаж байна вэ?

       -Баярлалаа. Батлан хамгаалах салбарын эрдэм шинжилгээний байгууллагад 38 жил ажиллаж байна. Багш, судлаач хүн гэдэг нэгдүгээрт, судалгаа шинжилгээний бүтээл туурвих, хоёрдугаарт эрдэмтэн, судлаачдыг бэлтгэх чухал үүрэгтэй байдаг. Тэгээд Батлан хамгаалахын их сургууль шинэ номын сантай болж, ийн номын сангийнхаа нээлтийг хийж байна. Үүнтэй холбоотойгоор өөрийн бүтээл туурвилыг шавь нартаа танилцуулах, мөн саяхан бичсэн “Мэдээллийн дайн, түүний стратеги, тактик” номыг олон нийтийн сургалт судалгааны эргэлтэд оруулж байгаагийн нээлт болж байна.

-“Мэдээллийн дайн, түүний стратеги, тактик” ном нь хэчнээн агуулгаас бүтэж байгаа вэ. Мөн ямар онцлогтой бүтээл вэ?

       -“Мэдээллийн дайн, түүний стратеги, тактик” ном нь мэдээллийн дайны түүхийг харуулсан шинэ бүтээл байгаа юм. Мөн мэдээллийн дайны тухай онол, үзэл баримтлал, байр суурийг илэрхийлсэн. Мэдээллийн дайны зэвсэг, хэрэгслийн тухай ч орсон байгаа.

-Энэхүү бүтээл нь Батлан хамгаалахын их сургуульд суралцаж байгаа оюутнуудад гол төлөв чиглэгдсэн байгаа юу. Олон нийтийг хамарсан бүтээл үү?

     -Шинээр гаргасан энэхүү ном маань анхлан суралцаж байгаа оюутнуудад биш, дээд түвшний буюу магистр, докторын сургалтын судалгаанд ашиглагдана. Мөн сургуулиа төгссөн, ажил албаа хашиж байгаа мэргэжилтнүүдэд зориулагдсан бүтээл.

-Анх та Батлан хамгаалахын их сургуульд хэрхэн багшаар орж байсан. Яагаад энэ чиглэлийг сонгон бүтээл, судалгаа хийх болсон юм бэ?

    -Би химийн цэргийн мэргэжилтэй. Тэгээд химийн чиглэлийн дарга байх үедээ ОХУ-д цэргийн шинжлэх ухааны докторын зэрэг хамгаалж, ирсэн. Тэгээд л боловсролын байгууллагад эрдэм шинжилгээ, сургалт судалгааны ажил хийж, багшлах хувь заяа тохиосон. Тэгээд Батлан хамгаалахын их сургуулийн тэргүүн, дэд захирал болон судлаачаар ажилласан. Одоо тус сургуулийнхаа эрдэм шинжилгээний хүрээлэнд ажиллаж байгаа.

-Номын нээлтэд тавигдсан ном бүтээл, судалгааны баримтуудыг үзлээ. Нийт хэчнээн бүтээл байна вэ?

   -Хамтын болон нэг сэдэвт бүтээл 50 орчим байна. Mөн 30 орчим эрдэмтэд бэлтгэсэн байна. Улсын захиалгатай төсөл 40 орчмыг хийсэн байна. Эрдэм шинжилгээний 200 гаруй өгүүлэл бичсэн. 70 гаруй ном бүтээлийг уншиж, ректор хийсэн байна. Эдгээр хийсэн бүтээл туурвилаа  шавь нартаа танилцуулж байна.