Хөл хорионы энэ үе бол гэр бүлдээ зарцуулах алдаж боломгүй үнэтэй цаг билээ. Шинэ зүйл сурах, танин мэдэхээс гадна гэр бүлдээ хөгжилтэй дурсамжууд бүтээж, үр бүтээмжтэй цагийг өнгөрүүлэх найман зөвлөмжийг хүргэж байна.

1. Хүүхэдтэйгээ монгол наадгайгаар тоглож, ёс уламжлалаа зааж өгөх

Монголын шагайн наадгайгаар хүүхэдтэйгээ тоглож, монголын ёс уламжлалыг талаар зааж өгөх үнэтэй цагийг хамт өнгөрөөгөөрэй. Морь уралдах, алаг мэлхий өрөх, шагай няслах зэрэг монгол уламжлалт шагайн наадгайгаар цагийг хөгжилтэй өнгөрөөх боломжтой.

2. Гэр бүлээрээ хамт хоол хийх

Гэр бүл, үр хүүхэдтэйгээ шинэ хоол туршиж, гишүүн бүр гар бие оролцон, хамтдаа ярилцаж, ширээ тойрон сууж хооллох нь гэр бүлийн харилцааг улам дотно болгодог билээ. Тиймээс гадаад хоол, эсвэл хэзээ ч хийж үзээгүй хоолоо туршаарай. Хэзээ нэгэн цагт тэр хоолыг харах бүрийд сайхан дурсамж сэргэнэ шүү дээ.

3. Хүүхдэдээ ном уншиж өгөх

Гэр бүлдээ ном уншиж өгөх нь илүү дотно, амьд харилцаа үүсгэдэг билээ. Ингэснээр хүүхдийнхээ боловсролд анхаарахаас гадна, номонд шимтүүлж, унших дадал суулгахад тусална.

4. Гэр бүлдээ тэмцээн зохиох

Гэр бүлдээ хэн нь шилдгийг шалгаруулах, эсвэл бяцхан дууны тэмцээн, зургийн тэмцээн, эсвэл хамгийн дэгжин хувцсаа өмсөж улаан хивсний ёслол зохиох, “Яг түүн шиг” тэмцээн зохиох зэрэг хөгжилтэй дурсамжийг бүтээж болох билээ.

5. Хүүхдэдээ түүхээ ярьж өгөх

Энэ цагийг ашиглан хүүхдэдээ өөрийн өнгөрсөн түүх, ээж болон аавтай нь хэрхэн танилцаж байсан түүх, бага нас гээд юуны ч тухай ярилцаж болно. Хүүхэдтэйгээ илүү нээлттэй байж, мөн хүүхдээ сонсож, ярилцах нь гэр бүлийг харилцааг илүү дотно болгоно.

6. Шинэ хэл сурах, шинэ зүйл турших

Удаан бодсон, сурахыг хүсдэг улсын хэлээ заавал ганцаараа гэлтгүй гэр бүлээрээ хөгжилтэй байдлаар сурч болно шүү дээ. Жишээ нь өдөрт сурсан үгнүүдээрээ ярилцах гэж хичээх, мөн шинэ үгээ хэн түрүүлж цээжилсэн нь оноо авах зэрэг хөнгөн байдлаар гэр бүлээрээ шинэ хэл сурч болно. Эсвэл шинэ программ сурах, зохиол бичиж үзэх зэрэг урьд нь хийхийг хүсдэг байсан зүйлсээ яагаад хийж болохгүй гэж.

7. Өмнө хийж чадаагүй зүйлсээ дуусгах

Мөн эхлүүлээд дуусгаагүй зүйлсээ хийж болно. Эхлүүлсэн цуврал, ном, киногоо дуусгах, эсвэл хувцасны шүүгээгээ цэгцлэх зэрэг зүйлсээ одоо л хийх цаг.

8. Онлайн дасгал хийх

Яагаад гэр бүлээрээ шинэ зүйл туршиж үзэж болохгүй гэж. Интернетээр иогийн хичээллэх, дасгал хийх зэрэг эрүүл амьдралын хэв маягийг гэр бүлдээ зуршил болгож болно.