“Орфей” театр Америкийн зохиолч Жон Патрикийн “Everybody loves Opal” жүжгийг “Опал” нэртэйгээр үзэгчдийн хүртээл болгохоор ажиллаж байна. “Опал” жүжиг “Фауст”, “Гэм зэм” жүжгээр олны сайшаалыг хүртээд байсан М.Батболдын найруулгаар үзэгчдийн хүртээл болох аж.

“Everybody loves Opal”  жүжгийн зохиол 1960 онд бичигдэж, 1961 оны аравдугаар сард Нью-Йоркийн “Longacre” театрт анх үзэгчдийн хүртээл болж байжээ. Түүнээс хойш 1963, 1967, 1993, 2017, 2018, 2019 онд дэлхийн театруудад дэлгэгдэж байсан түүхтэй.  Дан ганц “Everybody loves Opal” нэрээр бус  “Dear Pamela” гэх нэрээр дэлхийн зарим улс оронд тавигдаж, хүн зоны сэтгэл, тархинд гэрэл түгээсэн байна. Одоо ч гэсэн гэрлээ түгээсэн хэвээр.  АНУ-ын “The Barn” театрын тайзнаа тоглогдож байна. Энэхүү зохиолоор бүтсэн кино хүртэл байдгийг дуулгая.

               Эл жүжгийн зохиолч Жон Патрик амьд ахуйдаа 34 театрын зохиол, 27 кино дэлгэцийн бүтээл, 28 утга зохиолын бүтээл туурвиснаас хамгийн нэрд гарсан, нэрийн хуудас болсон жүжгийн зохиол нь “Everybody loves Opal” ажээ.

Тэрбээр 1954 онд Утга Зохиолын дээд шагнал болох Пүлитцер шагналыг хүртэж байсан бөгөөд түүний бичсэн зохиолоос сэдэвлэж хийсэн кино Оскарын шилдэг бүтээлд нэр дэвшсэн удаатай.